काठमाडौं । पछिल्लो समय ‘कुश्मा’ साहसिक पर्यटकको मुख्य केन्द्रबिन्दुको रुपमा स्थापित भएको छ । साहसिक खेल ‘बन्जी जम्प’ गर्न दैनिक सयौँको संख्यामा आन्तरिक तथा बाह्य पर्यटकहरु कुश्मा पुग्ने गर्दछन् । विश्वकै दोस्रो अग्लो ‘बन्जी जम्प’ गर्नका लागि अहिले यसतर्फ धेरैको आकर्षण बढेको छ । यसले पनि कुश्माको व्यापारमा वृद्धि गरेको स्थानीयहरु बताउँछन् ।
यसो त विश्वकै सबैभन्दा लामो दाबी गरिने झोलुङ्गे पुलपनि यहीँ पर्छ । करिब ५६७ मिटर लम्बाई रहेको ‘गण्डकी गोल्डेन ब्रिज’ घुम्ने पर्यटकको संख्यापनि पछिल्लो समय बढ्दो छ । ‘अहिले प्राय दिनभरी नै पुल भरिरहन्छ । चहलपहल बिहानैदेखि सुरु हुन्छ । टिकटक बनाउने, फोटो खिच्नेहरु पुलभरी भेटिन्छन् ।’ एक स्थानीयले भने -‘पुल घुम्ने पर्यटकको संख्या बढेसँगै यहाँको व्यापारमा पनि वृद्धी भएको छ । अहिले कुश्मा बजारका होटलहरु प्राय सबै भरिभराउ नै भेटिन्छन् ।’
कोरोना कहरले थलिएको कुश्मा बजारको व्यापार पछिल्लो समय बन्जी जम्प र पुलले बढाएको कुश्मा बजारमा होटल व्यवसाय गर्दै आएका स्थानीय व्यापारी हरिदत्त पन्तले बताए । ‘दिनभरी पसल कुर्नुपथ्र्यो, ग्राहक हुँदैन थिए’, उनले भने, ‘अहिले त दिनभरी नै पसल प्राय भरिभराउ हुन्छ । दैनिक व्यापारमा पनि वृद्धी भएको छ ।’
बागलुङ नगरपालिका १ रामरेखादेखि पर्वतको कुस्मा नगरपालिका १ अदुवाबारी जोड्ने कालिगण्डकी नदीमाथि हालै निर्माण गरिएको ५६७ मिटर लामो पुल नगरपालिकाले विश्वकै लामो दाबी गर्दै गिनिज बुकमा दर्ता गराउन निवेदन दिएको छ । पुलले एकसाथ ६१२ अर्थात ८५ मेट्रिकटन लोड धान्न सक्छ ।
