काठमाडौं । सनराइज बैंक लिमिटेडको नाफामा ४८ प्रतिशतले बढोत्तरी भएको छ । गत आर्थिक वर्षको चौथो त्रैमासम्मको अपरिस्कृत वित्तीय विवरण अनुसार बैंकले अघिल्लो वर्षको तुलनामा ४८.६९ प्रतिशत बढी नाफा कमाएको हो । अघिल्लो वर्ष बैंकले १ अर्ब ४४ करोड ६५ लाख रुपैयाँ खुद नाफा आर्जन गरेको थियो भने गतवर्ष सो नाफा बढेर २ अर्ब १५ करोड ९ लाख रुपैयाँ पुगेको छ ।
बैंकले सार्वजनिक गरेको वित्तीय विवरण अनुसार बैंकको वितरणयोग्य मुनाफा २५ करोड ६१ लाख रुपैयाँ रहेको छ । त्यस्तै, खुद ब्याज आम्दानी पनि २९.९७ प्रतिशतले बढेर ४ अर्व ५८ करोड रुपैयाँ पुगेको छ भने खुद फि तथा कमिसन आम्दानी ३.४१ प्रतिशत घटेर ९३ करोड २३ रुपैयाँमा आएको छ ।
त्यस्तै समिक्षा अवधिसम्ममा बैंकको इम्पेरमेन्ट चार्ज भने ९१ प्रतिशतले बढेर २५ करोड ४६ लाख रुपैयाँबाट ४८ करोड ७० लाख रुपैयाँ पुगेको छ । बैंकको निष्कृय कर्जा अनुपात १.४० प्रतिशत रहेको छ । बैंकको कर्मचारी खर्च २२.९९ प्रतिशत तथा अन्य सञ्चालन खर्च ८.७८ प्रतिशतले बढेको छ । चुक्ता पुँजी ६.६५ प्रतिशतले बढेर १० अर्व ११ करोड रुपैंयाँ पुगेको यस बैंकको जगेडा कोषमा ५ अर्व १४ लाख रुपैयाँ र रिटर्न अर्निङमा १ अर्व ४६ करोड रुपैंयाँ सञ्चित रहेको छ ।
बैंकले गत आर्थिक वर्षमा १ खर्व ३१ अर्व ६० करोड निक्षेप संकलन गरी १ खर्व २० करोड रुपैयाँ कर्जा प्रवाह गरेको देखिन्छ । बैंकको नाफासँगै प्रतिसेयर आम्दानी (ईपिएस) ६ रुपैयाँ १ पैसा बढेर २१ रुपैयाँ २६ पैसा पुगेको छ । यस अवधिसम्ममा बैंकको मूल्य आम्दानी अनुपात ९.७४ गुणा, प्रतिसेयर नेटवर्थ १६५ रुपैयाँ २९ पैसा, प्रतिसेयर कुल सम्पति मूल्य १६ सय ७१ रुपैयाँ रहेको छ ।
