">
काठमाडौं । धनगढी उपमहानगरपालिकाले १२२ जना ज्येष्ठ नागरिकलाई तीर्थयात्राका मुक्तिनाथ पठाएको छ । वार्षिक स्वीकृत कार्यक्रम अनुसार नगरका १९ वटै वडाबाट एक सय २२ जना ज्येष्ठ नागरिकलाई उपमहानगरपालिकाले मुस्ताङको मुक्तिनाथ पठाएको हो ।
बिहीबार नगर प्रमुख गोपाल हमाल, उपप्रमुख कन्दकला राना र वडाध्यक्षहरुले संयुक्त रुपमा बाजागाजा र टिकासहित बिदा गरेका हुन् । ज्येष्ठ नागरिकको सम्मानका लागि वार्षिक स्वीकृत कार्यक्रम अनुसार नै तिर्थयात्रामा पठाएको नगर प्रमुख गोपाल हमालले बताएका छन् ।
‘यो हाम्रो वार्षिक नीति तथा कार्यक्रममा स्वीकृत गरिएको योजना हो, सोही नीति अनुसार आज एक सय २२ जनालाई तिर्थयात्रामा पठाएका छौँ’, उनले भने, ‘आउने पुस्ताले ज्येष्ठ नागरिकलाई माया र सम्मान गर्नुपर्छ भन्ने धारणा पैदा होस् । यहाँका ज्येष्ठ नागरिकप्रती सम्मान गर्नलाई यो कार्यक्रम गरेका हौँ ।’
धार्मिक यात्रामा प्रत्येक वडाबाट कम्तीमा पाँच जनाका दरले ज्येष्ठ नागरिक छनोट गरिएको छ भने समाजमा विशिष्टकृत योगदान गरेका तर ज्येष्ठ नागरिकको परिभाषाभित्र पर्ने व्यक्तिहरुलाई पनि भ्रमणमा समेटिएको छ ।
भ्रमणको व्यवस्थापनको काम लक्ष्मीनारायण मन्दिरले गर्नेछ भने सहजीकरणका लागि उपमहानगरपालिकाको स्वास्थ्य शाखा र सामाजिक विकास शाखाका कर्मचारीलाई पठाइएको छ ।
