">
काठमाडौं । इलेक्ट्रिक कार निर्माता कम्पनी टेस्लाका सिइओ तथा विश्वकै धनाढ्य व्यक्ति एलन मस्कले सोसल मिडिया कम्पनी ट्विटरको स्वामित्व लिएका छन् ।
बिहीबारमात्रै मस्क ट्वीटरको केन्द्रीय कार्यालयमा प्रवेश गरेका थिए । त्यसलगत्तै ट्वीटरका सीईओ पराग अग्रवाल, चिफ फाइनान्सियल अफिसर नेड सेगल, लिगल एन्ड पोलिसी एक्जुकेटिभ विजय गाडे र सल्लाहकार सिन एजेड बाहिरिएको अमेरिकी समाचार संस्था ‘द न्युयोर्क टाइम्स’ले जनाएको छ ।
ट्विटरको स्वामित्व लिएसँगै मस्कले ट्विटरमै लेखेका छन्– ‘चरो अव स्वतन्त्र भयो ।’ मस्कले यसअघि ४४ अर्ब अमेरिकी डलरमा ट्विटर किन्ने सम्झौता गरेका थिए । तर, त्यसपछि उनी सम्झौताबाट पछि हटेका थिए ।
मस्कलाई अदालतले अक्टोबर २२ सम्म सम्झौता कार्यान्वयन गर्न सीमा तोकेको भए पनि मस्कले दुईदिन अघि नै ट्विटरको स्वामित्व लिएका हुन् ।
