काठमाडौं । नेपाल आयल निगमको कुल ऋण ३३ अर्ब बढी पुगेको छ । आयल निगमले भारतीय आयल कर्पोरेसन (आईओसी)लाई मात्रै २३ अर्ब ६० करोड रुपैँया बक्यौता रकम तिर्न बाँकी देखिएको छ ।
यसो त निगमले ३ महिनाअघि नेपाल सरकारबाट ७ अर्ब र राष्ट्रिय वाणिज्य बैंकबाट ३ अर्ब ऋण रकम जुटाएर आईओसीलाई भुक्तानी गरेको थियो । यो सँगै सरकार, राष्ट्रिय वाणिज्य बैंक र आईओसीलाई गरी हाल तिर्नुपर्ने रकम ३३ अर्ब ६० करोड पुगेको निगमले जनाएको छ । यद्यपी हाल निगमले आफु नाफामा रहेको दाबी गर्दै आएको छ ।
नेपाल आयल निगमले हाल नाफामा रहेको दाबी गरे पनि बक्यौता रकम भने घटाउन सकेको छैन । पछिल्लो तीन महिनायता अन्तर्राष्ट्रिय बजारमा कच्चा तेलको मूल्य घट्दै गएपनि आईओसीलाई तिर्नुपर्ने वक्यौता रकम उच्च भएकै कारण नेपालमा सो अनुसार मूल्य घटाउन नसकिएको निगमले जनाएको छ ।
हाल पेट्रोल, मट्टितेल, हवाई इन्धन बिक्रीमा निगम नाफामा छ । हाल निगमलाई डिजेलमा भने प्रतिलिटर ६ रुपैयाँ ३४ पैसा नोक्सानी छ । यद्यपी आगामी १५ दिनमा ३९ करोड नाफा आर्जन गर्दै निगम २० महिनाको अन्तरालपछि नाफामा जाने देखिएको छ ।
