सप्तरी । सप्तरी निर्वाचन क्षेत्र नम्बर २ मा जनमत पार्टीका अध्यक्ष चन्द्रकान्त (सीके) राउतले फराकिलो मतान्तर कायम गर्दै अग्रता हासिल गरेका छन् । राउतले मधेश आन्दोलनको नेतृत्व गरेका उपेन्द्र यादवलाई १३ हजारभन्दा बढी मतले पछि पारेका छन् ।

पछिल्लो मत परिणाम अनुसार राउतले २७ हजार ४७७ मत पाएका छन् भने उनका प्रतिद्वन्द्वी उपेन्द्र यादवले १३ हजार ६८३ मत प्राप्त गरेका छन् । राउतको यो अग्रतासँगै सप्तरी २ मा उनको जित पक्का देखिएको छ । योसँगै सीके राउतलाई मधेशको नयाँ नेताको रुपमा समेत हेरिन थालिएको छ ।

सप्तरी २ जनमतका सीके राउतको गृहनगरसमेत हो । यसअघि स्थानीय तहको निर्वाचनमा जनमत पार्टीले सप्तरीका दुई स्थानीय तहमा जित हासिल गरेको थियो ।