काठमाडौं । मंसिर ४ गते हुने निर्वाचन प्रयोजनका लागि आयोगले खरिद गरेको सेनिटाइजरमा विषाक्त केमिकलको मात्रा अत्याधिक भेटिएको छ । विषाक्त केमिकलको मात्रा बढी भएको सेनिटाइजरको प्रयोगले स्वास्थ्यमा प्रतिकुल असर गर्ने भन्दै औषधि व्यवस्था विभागले प्रयोग नगर्न कडा चेतावनी दिएको छ ।
निर्वाचन आयोगले प्रत्येक मतदान केन्द्रमा प्रयोगका लागि भन्दै ५०० एमएलको १० थानका दरले प्रत्येक मतदान केन्द्रमा ५ लिटरको सेनिटाइजर वितरण गर्ने तयारी गरेको थियो भने केही मतदान केन्द्रमा सेनिटाइजर पठाईसकेको थियो ।
तर, सेनिटाइजरमा विषाक्त केमिकलको मात्रा अत्याधिक रहेको पुष्ठी भएसँगै आयोगले सो सेनिटाइजर प्रयोग नगर्न निर्देशन दिएको छ । आयोगले आफ्नो सिष्टममार्फत मुख्य निर्वाचन अधिकृत र निर्वाचन अधिकृतहरुलाई एसएमएस मार्फत सेनिटाइजर प्रयोग नगर्न सूचित गरेको हो । उक्त एसएमएसमा सेनिटाइजर प्रयोग गर्न योग्य नरहेको उल्लेख गरिएको छ ।
