काठमाडौं । नेपाल इन्भेष्टमेन्ट बैंक लिमिटेड, कोष प्रबद्र्धक तथा एनआईबिएल एस क्यापिटल योजना ब्यवस्थापक तथा डिपोजिटरी रहेको ‘एनआईबिएल म्युचुअल फण्ड’ अन्तर्गत संचालन हुने पाँचौ योजना ‘एनआईबिएल ग्रोथ फण्ड’को सार्वजनिक निष्काशन यहि पौष ७ गते बाट खुल्ला गरिएको थियो । हालसम्मकै सबैभन्दा ठुलो म्युचुअल फण्ड योजनाको सार्वजनिक निष्काशन समेत रहेको ‘एनआईबिएल ग्रोथ फण्ड’मा आवेदन दिने आज अन्तिम दिन रहेको छ ।
सार्वजनिक निष्काशनको १४औँ दिनसम्ममा यस योजनाले कुल १६ करोड इकाई मध्ये करिब ४१ हजार बढी आवदेकहरुबाट करिब १२.३ करोड भन्दा बढि इकाईको लागी आवदेन प्राप्त गरिसकेको छ ।
वर्तमान तरलताको अवस्था तथा समग्र आर्थिक गतिविधिमा आएको सुस्तताका बाबजुद यस योजनामा आम लगानीकर्ताहले उत्साहका साथ लगानी गरिरहेका छन् । निष्काशनको अन्तिम दिनमा समेत यस योजनामा अन्य दिनहरुमाजस्तै लगानीकर्ताहरुबाट उल्लेख्य आवेदन प्राप्त हुने विश्वास योजना व्यवस्थापकले गरेको छ ।
यस ‘एनआईबिएल ग्रोथ फण्ड’को आकार १ अर्ब ६० करोड र समयावधि १० वर्षको रहेको छ । योजनाको अवधि भर यस योजनाले बार्षिक प्रतिफल (Effective Annual Return)को रुपमा २०.२५ प्रतिशत प्रतिफल आफ्ना इकाईधनीहरुलाई दिन सक्ने प्रक्षेपण समेत गरेको छ ।
न्यूनतम रु १ हजार देखि अधिकतम रु १६ करोड सम्म लगानी गर्न सकिने यस योजनामा लगानीकर्ताहरुले आफ्नो सी-आश्वा खाता रहेको बैंकबाट वा मेरो शेयरमा लगईन गरि अनलाईनबाट पनि आवेदन दिन सकिन्छ ।
‘एनआईबिएल ग्रोथ फण्ड’का इकाईहरु नेपाल स्टक एक्सचेन्जमा सूचिकृत भई योजनाको समयावधिसम्म इकाईहरु दोश्रो बजारमा खरिद तथा बिक्री गर्न सकिने छ ।
