काठमाडौं । राष्ट्रपति विद्यादेवी भण्डारीले देशको अर्थतन्त्रमा चुनौति थपिएको बताएकी छन् । आइतबार बैंक तथा वित्तीय संस्था परिसंघको तेस्रो साधारणसभालाई सम्बोधन गर्दै राष्ट्रपति भण्डारीले यस्तो बताएकी हुन् ।

‘देशमा आन्तरिक उत्पादन वृद्धि गर्न नसकिँदा अर्थतन्त्रमा चुनौति थपिएको हो’, राष्ट्रपति भण्डारीले भनिन्, ‘तरलता संकुचनसहित बाह्य क्षेत्रमा देखिएको दबाब, उत्पादनमुलक क्षेत्रमा कमजोर लगानी विस्तार र उत्पादकत्व वृद्धिसहित उचित प्रतिफलको अभावले चुनौती थपेको हो ।’

कार्यक्रममा बोल्दै राष्ट्रपति भण्डारीले मुलुकको आत्मनिर्भर अर्थतन्त्र निर्माण र राष्ट्रिय पूँजी परिचालमा बैंक तथा वित्तीय संस्थाको भूमिका महत्वपूर्ण रहेको बताइन् । तर, आर्थिक विकास र रोजगारी वृद्धिमा अपेक्षाकृत उपलब्धि भने हासिल हुन नसकेको राष्ट्रपति भण्डारीले बताएकी छन् ।

‘बैंक तथा वित्तीय संस्थाले नेपाल सरकारसँगको समन्वयमा प्रभावकारी योजना बनाई कार्यान्वयन गर्नुपर्छ’, राष्ट्रपति विद्यादेवि भण्डारीले भनिन्, ‘आन्तरिक उत्पादन बढाउन र उत्पादनशीलता बढाउन सके आयातमा आधारित उपभोग प्रणाली नियन्त्रण र यसैमा आधारित राजस्व प्रणालीमा सुधार ल्याउन सकिन्छ ।’