काठमाडौं । लक्ष्मी बैंक र सनराइज बैंकबीच मर्जर सम्झौता भएको छ । सोमबार दुवै बैंकबीच एकआपसमा गाभ्ने/गाभिने सम्बन्धी औपचारिक सम्झौता भएको हो ।
प्रारम्भिक सम्झौता अनुसार दुवै बैंक १ः१ स्वाप रेसियोमा गभिन तयार भएका हुन् । यद्यपी सम्पत्ति तथा दायित्वको मूल्यांकन (डीडीए) रिपोर्ट आएप्रश्चात अनुपातमा केही घटबढ हुन सक्नेछ ।
सम्झौतापत्रमा लक्ष्मी बैंकका तर्फबाट अध्यक्ष रमण नेपाल र सनराइज बैंकका तर्फबाट बैंकका अध्यक्ष मोतिलाल दुगडले हस्ताक्षर गरेका हुन् । मर्जरपछि बैंकको नाम लक्ष्मी सनराइज बैंक नै रहने भएको छ ।
हाल लक्ष्मी बैंकको चुक्ता पूँजी ११ अर्ब ५५ करोड रुपैयाँ रहेको छ भने सनराइज बैंकको चुक्ता पूँजी १० अर्ब ११ करोड रुपैयाँ रहेको छ । दुवै बैंकको मर्जरपछि बन्ने नयाँ बैंकको चुक्ता पूँजी २१ अर्ब ६६ करोड रुपैयाँ पुग्नेछ ।
