कठमाडौं । काठमाडौं उपमहानगरपालिकाको न्यायिक समितिमा उजुरी दिनेहरुको संख्या बढेको छ ।
पछिल्लो समय बजारमा मन्दीको प्रभाव बढ्न थालेपछि न्यायिक समितिमा उजुरी दिनेहरुको संख्या पनि बढेको हो । न्यायिक समितिमा पर्ने उजुरीहरुमध्ये अधिकांश उजुरी पसलहरु बन्द गर्न, सटर खालि गरिदिन, कोठा खालि गराइदिन लगायतका उजुरी दिनेहरुको रहेको काठमाडौं महानगरपालिकाकी उपमेयर सुनिता डंगोलले बताएकी छिन् ।
‘पछिल्लो समय न्यायिक समितिमा उजुरी दिनेहरु बढेका छन् । जसमध्ये धेरैजसो उजुरी पसल बन्द गर्ने र सटर खाली गर्नुपर्यो भन्ने खालका रहेका छन् ।’, उनले भनिन्, ‘न्यायिक समितिको इजलासमा प्रत्येक १० उजुरीमा ८ वटा उजुरीहरु बन्द गराइदिन र खालि गराइ पाउँ भन्ने किसिमले पर्ने गरेका छन् ।’
न्यायिक समितिमा यस्ता उजुरी पर्नुको कारण अर्थतन्त्र चलायमान हुन नसक्नु रहेको उपमेयर डंगोलको भनाई छ । ‘धेरै जनाले यो आर्थिक मन्दी आभाष गरिरहनु भएको छ । अर्थतन्त्र चलायमान नभएको भन्ने पनि यसले संकेत दिन्छ । यस्ता खालका विषयवस्तुहरु बढी आउन थालेको छ ।’, उनले भनिन्, ‘उजुरी पर्ने क्रम बढ्दो छ । यसले राम्रो संकेत गर्दैन ।’
त्यस्तै, उपप्रमुख डंगोलले महानगरपालिकाले बजार अनुगमन र मूल्यांकनलाई तिब्रता दिने समेत बताएकी छिन् । ‘महानगरको नीतिअनुसार नै शिक्षा, स्वास्थ्य, खाद्यान्नसँगै योजना अनुगमनको पाटोलाई पनि प्रमुख विषय बनाएर अघि बढिरहेका छौँ ।’, उनले भनिन्, ‘स्थानीय सरकारले हरेक उपभोक्ताले उपभोग गरिरहेको कुरा ठिक छ भन्ने विश्वास गर्ने वातावरण बन्नेगरी काम गर्छौं ।’
