काठमाडौँ । अहिले सामाजिक संजालमा ठुलो थालीमा टन्न खाना राखेर खिचिएका फोटोहरु चर्चित छन् । कपनको काठमाडौंको कपनस्थित ज्योति चोकमा रहेको भोजन अनलिमिटेड रेस्टुरेन्ट एन्ड बारमा बाहुबाली थाली सेट खान पुगेकाहरु खाना अघि फोटो खिच्छन् र सामाजिक संजालमा राख्छन् । टिकटकमा यो थाली सेटको चर्चा झन् बढी छ । बाहुबली थाली सेट पस्कने रेष्टुरेण्ट र तिनका सञ्चालक प्रशारण जोशी आफैँ टिकटकमा ‘एक्टिभ’ भएका कारण पनि टिकटकमा यसको चर्चा बढी छ । यसअघि यो थालीको नाम महाराजा थाली सेट थियो । पछि नाम परिवर्तन गरेर बाहुबली थालीसेट बनाइयो ।
कस्तो छ बाबुबली थाली ?
बाहुबली थाली सेट चर्चित हुनुको मुख्य कारण भनेको यसको भव्यता हो । २६ देखि ३० परिकारसम्म राखेर ‘सर्भ’ हुने यो खाना ४ जनादेखि ८ जनासम्मका लागि पर्याप्त हुन्छ । यहि कारण यो थाली खान समूह-समूह आउँछन् । ७ जनाले एक दिन थकाली खाना खाने हो भने पनि औसतमा ३५०० रुपैयाँ पर्छ राम्रो रेष्टुरेन्टमा । सो रकममा यो भव्य थाली सेट पाइने हुनाले पनि यहाँ आउनेहरुको संख्या निकै बढी छ ।
बाहुबली थाली सेटमा मटन, चिकेन र भेज गरी तीन थरीको बिरयानी हुन्छ । यस अलावा सात किसिमको तन्दुरी परिकार, सोहि अनुसारको तरकारी, र मासुका परिकार हुन्छन् । मासुका परिकारमा पनि चिकेन र मटन दुवै हुन्छ । जेरी, लालमोहन लगायतका मिठाइ, दही र लस्सी पनि हुने यो सेटमा दाल, भात, र तरकारी पनि हुन्छ । हुन त एकै सेटमा भेज-ननभेजहरु पनि रमाउन सक्छन् । तर पूरै भेज सेट तयार गर्न अर्डर भयो भने यस्तो साकाहारी बाहुबली थाली सेट पनि तयार गर्छ भोजन अनलिमिटेडले ।
विहान ११ बजेदेखि बेलुकी ११ बजेसम्म खुल्ने रेष्टुरेण्टमा एकै दिन ५७ थालीसम्म बिकेको रेष्टुरेण्ट संचालक जोशी बताउँछन् । प्राय: बेलुकीको खानाका लागि ग्राहकहरु यहाँ बढी आउने गरेका छन् । अरु दिन भन्दा शनिबार बढी भीड हुने यो ठाउँमा परिवार बढी आउँछन् । रेष्टुरेण्ट सञ्चालक जोशीका अनुसार करिव २० देखि ३० मिनेट सेट तयार गर्न नै लाग्ने हुनाले पहिला नै बुकिङ्ग गरेर आउनेहरुको संख्या बढी छ ।
रेष्टुरेण्ट पुगिसकेपछि थाली तयार नहुन्जेलसम्म ग्राहकले पानीपुरी खान पाउँछन् । यो थालीकै सेटमा पाइने र अतिरिक्त रकम नलाग्ने सेवा हो । सञ्चालक जोशीका अनुआर थालीमा रहेको सबै खाना करिव १३ किलोको हुन्छ भने पूरै सेटको मूल्य ३५ सय रुपैयाँ पर्छ । समय-समयमा रेष्टुरेण्टले विशेष छुट पनि ल्याईरहेको हुन्छ ।
२९ बर्षीय ठिटोले सुरु गरेको ‘बिजनेश’!
यो रेष्टुरेण्टका संचालक प्रशारण जोशी भर्खर २९ बर्षका भए । उनले यो रेष्टुरेण्टमा मात्र करिव ७५ लाख रुपैयाँ लगानी गरेका छन् । २०७३ सालमा डेनमार्क गएका उनले त्यहाँको निल्स ब्रक कोपनहेगन बिजनेस कलेजबाट हस्पिटालिटी म्यानेजमेन्टमा स्नातक तहको पढाइ पूरा गरेका छन्। उनी त्यसपछि नेपाल आएका थिए । उनको यो कन्सेप्ट भने डेनमार्क रहँदैको हो । २०७७ सालमा नेपाल फर्किएपछि २०७८ भदौमा उनले भोजन अनलिमिटेड रेस्टुरेन्ट एन्ड बार खोले । उनी आफैँ रेष्टुरेण्टका मालिक भए पनि उनी भान्सामा पनि विशेष ध्यान दिन्छन् । उनी ललितपुरको जावलाखेलमा पनि भोजन अनलिमिटेडको शाखा सञ्चालनको तयारीमा छन् । असोज दोश्रो साताबाट उनको नयाँ साखा सुरु हुनेछ ।
