काठमाडौं । काठमाडौं महानगरपालिकाका मेयर बालेन्द्र शाह (बालेन)ले काठमाडौंका सडकमा आन्दोलनरत शिक्षकलाई व्यङ्ग्य गरेका छन् । मेयर शाहले सामाजिक सञ्जाल फेसबुकमा माडिएको बिरुवा र दूबोको फोटो सार्वजनिक गर्दै शिक्षकहरुलाई व्यङ्ग्य गरेका हुन् ।
मेयर शाहले फेसबुकमा पोष्ट गरेको व्यङ्ग्यात्मक स्टाटसमा नेपाली पुस्तकमा समावेश भएको लक्ष्मीप्रसाद देवकोटाको कविता राखेका छन् । उनले लेखेका छन्– ‘नटिप्नु हेर कोपिला, नचुड्नु पाप लाग्दछ, नच्यात्नु फुल नानी हो, दया र धर्म भाग्दछ ।’
आन्दोलनका क्रममा माइतीघर–बानेश्वर सडकखण्ड छेउछाउमा भएका रुख–बिरुवा तथा दुबो सखाप भएको फोटो सामाजिक सञ्जालमा भाइरल भएपछि मेयर शाहले प्रतिक्रिया जनाउँदै उक्त फोटो फेसबुकमा सेयर गरेका हुन् । बालेनको उक्त पोस्टमा अधिकांशले आन्दोलनका नाममा लाखौँ खर्च गरेर रोपिएका बिरुवा र दुबो नष्ट गर्नू गलत भएको प्रतिक्रिया दिएका छन् । अझ धेरैले त सोही पोस्टमार्फत शिक्षकहरुको व्यङ्ग्यसमेत गरेका छन् ।
