काठमाडौं । वैदेशिक रोजगारीका लागि विभिन्न देश पठाईदिने भन्दै रकम ठगी गर्ने दुई जना पक्राउ परेका छन् ।
पक्राउ पर्नेमा उदयपुर जिल्ला बेलका नगरपालिका वडा नं.०५ घर भई हाल ललितपुर महानगरपालिका वडा नं. १२ मंगलबजार बस्ने ३२ वर्षीय चेतना श्रेष्ठ र पर्सा जिल्ला निर्मलबस्ती नगरपालिका वडा नं. २ स्थाई घर भई हाल काभ्रेपालनचोक जिल्ला बनेपा नगरपालिका वडा नं.९ बस्ने ४४ वर्षीय मुक्तिराज बोम्जन रहेका छन् ।
श्रेष्ठले राधेश्याम बानियालाई साइप्रस पठाईदिन्छु र साइप्रस पुगेपछि कृषि फार्ममा काम लगाईदिन्छु, मासिक १ लाख ५० हजार तलब हुन्छ भनि विश्वास दिलाई प्रलोभनमा पारेर ७ लाख ५० हजार ठगि गरेकी थिइन् । त्यस्तै,बोम्जनले ७ जनालाई युके पठाईदिने भन्दै २० लाख ठगी गरी सम्पर्क विहिन भएका थिए ।
काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले श्रेष्ठलाई मंगलबजारबाट र बोम्जनलाई धुलिखेल बजारबाट पक्राउ गरेको हो । पक्राउ परेका उनीहरुलाई थप अनुसन्धान तथा कारवाहीका लागि वैदेशिक रोजगार विभाग पठाईएको प्रहरीले जनाएको छ ।
