">
काठमाडौँ । अर्थ सरोकार डटकमले एनआईसी एशिया बैंकले राष्ट्र बैंकको नियम विपरित ब्याजदर सार्वजनिक गरेको समाचार सार्वजनिक गरेपछि राष्ट्र बैंकको ठाडो निर्देशनमा अन्तत: एनआईसी एशिया बैंकले ब्याजदर सच्याएको छ । भदौ महिनाको क वर्गका बैंकको बचत निक्षेपमा औसत ब्याजदर ५.५०४ प्रतिशत छ । यसमा १० प्रतिशतको क्यापको हिसाब गर्ने हो भने बैंकले ६.०५४ प्रतिशतभन्दा बढी ब्याज पुर्याउने काम नियम विपरित हुन्छ ।
तर, प्राइम कमर्सियल बैंक र एनआईसी एशिया बैंकले भने बचतमा ६.३५८ प्रतिशत ब्याज दिने सूचना जारी गरेका थिए । एनआईसी एशिया बैंकले भने ब्याजदर सच्याएर अहिले ६.०५४ नै बनाएको छ ।
बैंकका प्रमुख कार्यकारी अधिकृत रोशन कुमार न्यौपानेले ब्याजदर सच्याएको पुष्टी गरेका छन् । उनले सच्याईएको ब्याजदर वेवसाइटमासमेत सच्याएर राखिएको बताएका छन् । उनले ब्याजदर सच्याएको जानकारी दिएपछि अर्थ सरोकारले भेरिफाई गर्दा वेवसाइटमा समेत ब्याजदर सच्याइएको पाइएको छ ।
नेपाल राष्ट्र बैंकले समेत एनआईसी एशिया बैंकले ब्याजदर सच्याएको पुष्टी गरेको छ । ‘हामीले एनआईसी एशिया र प्राइम कमर्सियल बैंक दुबैलाई ब्याजदर सच्याउन भनेका छौँ । एनआईसी एशियाले सच्याईसक्यो । प्राइम कमर्सियल बैंकले सच्याउँदैछ ।’
