‘भवन निर्माणको काम सबै सकेर चेक कलेक्सनका लागि मैले कृष्ण वडलाई अख्तियारी दिएर विद्यालय पठाएको थिएँ । वडले विद्यालयबाट साउन ५ गते चेक बुझेको देखिन्छ । तर, वडले उक्त चेक मलाई दिएनन्, बरु चेक आफैसँग भएको तर अहिले चेक लिएर धनगढी जाने समय नभएको भन्दै ढाँटिरहे ।’ पीडीत जनार्दन बमले अर्थ सरोकारसँग भने- ‘मैले वडलाई चेक लिएर धनगढी आउनुस्, यतै रकम जम्मा गरेर हिसाब गरौँला भनेको हुँ । तर, उहाँले चेक मसँगै छ, तर अहिले समय छैन भन्दै ढाँट्नुभयो । चेक लिएको १ महिना बितिसक्दा पनि चेक नपाएपछि मैले विद्यालयमा उक्त चेक रद्ध गर्न पत्राचार गरें ।’
आफ्नो फर्मको कागजात किर्ते गरेर खाता खोली रकम चलाएको देखिएपछि बम प्रहरीमा पुगे । प्रहरीले पनि बमको निवेदनका आधारमा कृष्ण वडलाई पक्राउ गर्यो । पछि तीन पक्षकै छलफलका क्रममा बैंकले भदौ २२ गतेभित्र रकम जम्मा गर्ने गरी तमसुक बनाएर छोडेको बमले बताए । ‘बैंक आफैंले मुद्धाको काम पछि गरौंला, अहिलेलाई रकम असुलीतर्फ लागौँ भनेर तमसुक बनाएर छोडेको हो । तर, अझै पनि पैसा पाएको छैन ।’, बमले अर्थ सरोकारसँग भने, ‘यति गर्दा पनि पैसा नआएपछि अव कानुनी प्रक्रियामा जाने सोचेको छु।’
के भन्छ बैंक ?
बैंकका बझाङ शाखाका शाखा प्रबन्धक शन्तराज जोशीले यो प्रकरणमा बैंकको गल्ती भएको स्वीकारेका छन् । ‘भीडभाडमा खाता खोल्न प्रयोग भएका सबै डकुमेन्ट हेर्न सकिएन । तर, चाहिने सबै डकुमेन्ट हामीले लिएका छौँ । हेर्दा सबै सक्कलीजस्तै देखिन्छन् ।’, अर्थ सरोकारसँग कुराकानी गर्दै ब्रान्च मेनेजर जोशीले भने, ‘तर, गल्ती भयो । खाता खोल्ने क्रममा बैंक चिप्लिएकै हो । हामीबाट गल्ती भएकै हो ।’
के भन्छ प्रहरी ?
यता प्रहरी निरीक्षक दिपेश चौधरीले उक्त घटनामा प्रहरीमा कुनै पनि जाहेरी नपरेको बताएका छन् । सामान्य निवेदन परेकाले दुवै पक्षबीच बुझ्दा कागज किर्ते गरेर खोलेको खाताबाट हिनामिना भएको रकम फिर्ता गर्ने सहमति गरेको प्रहरी निरीक्षक चौधरीको भनी छ । यद्यपी उक्त घटनामा बैंकका ब्रान्च मेनेजर र कृष्ण वडको गल्ती देखिएको चौधरीको भनाई छ । आफूहरुकहाँ कुनै पनि जाहेरी नपरेकाले मुद्धाका रुपमा अघि बढाउन नसक्ने भन्दै चौधरीले पीडीतले जाहेरी दिएको खण्डमा मुद्धा अघि बढ्नेसमेत बताएका छन् । ‘हामीले अनुसन्धान गर्न जाहेरी चाहिन्छ । अहिलेसम्म कुनै जाहेरी परेको छैन । जाहेरी पर्यो किर्ते र ठगी मुद्धामा अनुसन्धान हुन्छ ।’, उनले भने ।
