काठमाडौँ । नेपाल नागरिक उड्डयन प्राधिकरणले श्री र फिस्टेल एयरको हेलिकप्टरको सम्पूर्ण उडानमा प्रतिबन्ध लगाएको छ । हवाई सुरक्षामा गम्भीर लापरवाही गरेको पाइएपछि प्राधिकरणले दुवै एयरलाइन्सलाई कारवाही स्वरुप सम्पूर्ण हेलिकप्टर उडानमा प्रतिबन्ध लगाएको हो ।
दुवै एयरका हेलिकप्टरले लुक्लास्थित तेन्जिङ हिलारी विमानस्थलमा ‘भिजुअल फ्लाइट रुल्स’ (भिएफआर)को मापदण्ड पालना नगरेको भन्दै कारवाही गरिएको प्राधिकरणले जनाएको छ ।
प्राधिकरण स्रोतका अनुसार दुवै एयरलाइन्सका हेलिकप्टरले पटकपटक भिएफआर उडान गर्दा मौसम सफा नभएको स्थितिमा पनि एकै पटक उडान गर्ने गरेको पाइएको छ । स्रोतका अनुसार दुवै एयरका हेलिकप्टरले १५ सय मिटर उचाइ र ५ किलोमिटर लम्बाइ भिजिबिलिटी नभएको अवस्थामा पनि जबरजस्ती उडान गरेको पनि पाइएको छ । जसलाई हवाई सुरक्षाका दृष्टिकोणले गम्भीर त्रुटि मानिन्छ ।
यसरी पटकपटक हवाई सुरक्षामा गम्भीर लापरवाही गरेको पाइएपछि प्राधिकरणले एएस–३५० सिरिजको फिस्टेल एयरका दुई र श्री एयरको एउटा हेलिकप्टर उडानमा प्रतिबन्ध लगाएको छ ।
