काठमाडौं । ६० किलो सुन तस्करी प्रकरणमा प्रहरीले थप एकजनालाई पक्राउ गरेको छ । अनुसन्धानका क्रममा सुन तस्करी प्रकरणमा संलग्न रहेको पाइएपछि प्रहरीले बाराका शिव कुमार सफरलाई पक्राउ गरेको हो । योसँगै सुन तस्करी प्रकरणमा पक्राउ पर्नेहरुको संख्या २७ पुगेको छ ।

गत साउन ३ गते राजश्व अनुसन्धान विभागले त्रिभुवन अन्तर्राष्ट्रिय विमानस्थलबाट बाहिरिएको ‘बे्रक शु’सहित करिब डेढ क्विन्टल सुन सिनामंगलबाट बरामद गरेको थियो । ब्रेक शुबाट छुट्याएर, गालेर जोख्दा उक्त सुनको तौल ६१ किलो मापन गरिएको थियो । तस्करीको उक्त सुन २४ क्यारेट अर्थात ९९.९ प्रतिशत शुद्ध रहेको पाइएको थियो ।

सोही प्रकरणमा संलग्नताका आधारमा प्रहरीले ठूलो संख्यामा चिनियाँ नागरिकलाईसमेत पक्राउ गरिसकेको छ । प्रकरणका मुख्य नाइकेका रुपमा रहेका चिनियाँ नागरिकसँग मिलेर तस्करी गरेको पाइएपछि प्रहरीले थप व्यक्तिहरुलाई पनि पक्राउ गरी अनुसन्धान अघि बढाएको छ ।

सोही प्रकरणमा प्रहरीको केन्द्रीय अनुसन्धान ब्यूरो (सीआईबी)ले पूर्वसभामुख कृष्णबहादुर महराका छोरा राहुललाई पक्राउ गरेको छ भने पूर्वउपराष्ट्रपति नन्दबहादुर पुन पासाङका छोरा दिपेशसँग बयान लिइसकेको छ ।