काठमाडौं । अख्तियार दुरुपयोग अनुसन्धान आयोगले पशुपतिको जलहरी प्रकरणमा पशुपति क्षेत्र विकास कोषका तत्कालीन सदस्य सचिव डा. प्रदीपकुमार ढकाल र तत्कालीन कोषाध्यक्ष मिलनकुमार थापाविरुद्ध भ्रष्टाचार मुद्दा दायर गरेको छ ।
जलहरी राख्ने क्रममा भ्रष्टाचार गरेको ठहर गर्दै अख्तियारले दुवैजनाविरुद्ध विशेष अदालतमा भ्रष्टाचार मुद्दा दायर गरेको हो ।
आयोगले उनीहरुले जलहरी राख्ने क्रममा एक किलो ४९१.७१८ ग्राम सुन हिनामिना गरेको ठहर गरेको छ । हिनामिना भएको सुनमार्फत दुवैजनाले १ करोड १७ लाख १ हजार ७८१ रुपैयाँ ८५ पैसा भ्रष्टाचार गरेको अख्तियारले आरोप लगाएको छ ।
यसो त भ्रष्टाचार मुद्दा दायर भएका कोषका तत्कालीन कोषाध्यक्ष थापाले यसअघि आफू जलहरी प्रकरणमा निर्दोष रहेको दाबी गरेका थिए । यतिसम्म कि उनले जलहरी प्रकरणमा आफूविरुद्ध मुद्दा चलाए मन्दिरभित्र आत्महत्या गर्ने चेतावनी समेत दिएका छन् ।
