काठमाडौँ । समयमा सडक निर्माणको काम सम्पन्न नभएपछि स्थानीयले सांसदको फोटो रुखमा टाँसेका छन् । मदन भण्डारी राजमार्गअन्तर्गत सुर्खेत बड्डीचौरदेखि खम्बागाडे खण्डको १२ किलोमिटर सडक अलपत्र पारेको भन्दै पश्चिम सुर्खेतका स्थानीयले सांसद दिक्पाल शाहीको फोटो रुखमा टाँसेका हुन् ।
उनीहरुले ‘माननीय ठेकेदार दिक्पाल शाहीज्यू बाटो कहिले बन्छ ?’ भन्दै सांसद शाहीको फोटो रुखमा टाँसेका हुन् । सांसद शाही दैलेख क्षेत्र नम्बर २ बाट प्रतिनिधि सभा सदस्यमा निर्वाचित सांसद हुन् ।
उक्त सडकखण्ड कालोपत्रे गर्ने भन्दै सांसद शाहीका छोराको नाममा रहेको अनक जयदेवी जेभी बाँकेले जिम्मा लिएको थियो । ४२ करोड ४७ लाख ६१ हजार रुपैयाँमा ठेक्का सम्झौता भएको लामो समयसम्म पनि काम सम्पन्न नभएपछि स्थानीयहरुले सांसदको फोटो रुखमा टाँसेका हुन् ।
पटकपटक सडक निर्माणको काम सक्नका लागि दवाव दिँदा पनि वास्ता नगरेपछि बाध्य भएर सांसदको फोटो रुखमा टाँसेको स्थानीयले बताएका छन् । हाल शाहीको तस्वीरसहितको रुखमा टाँसिएको फोटो सामाजिक सञ्जालमा भाइरल भइरहेको छ ।
