काठमाडौँ । नेपाल विद्युत प्राधिकरणले २१ हजार ग्राहकको लाइन काटेको छ । प्राधिकरणले महसुल नतिर्ने देशभरीका २१ हजार ग्राहकको लाइन काटेको हो । पटकपटक ताकेता गर्दा पनि महसुल नउठेपछि लाइन काट्न बाध्य भएको प्राधिकरणले जनाएको छ । लाइन काटेर प्राधिकरणले करिब ५० करोड रुपैयाँ असुल गरेको छ ।
देशैभरी महसुल उठाउने अभियानमा रहेको प्राधिकरणले तिहारपछि लाइन काट्ने तथा महसुल असुली गर्ने कार्यलाई थप तिव्रता दिने प्राधिकरणका कार्यकारी निर्देशक कुलमान घिसिङले बताएका छन् ।
यसो त मिटर रिडिङ भएको मितिले १६औँ दिनसम्म ५ प्रतिशतका दरले र ३१औँ दिनदेखि ४०औँ दिनसम्म १० प्रतिशतका दरले थप दस्तुर लाग्ने व्यवस्था छ । तर, ४०औं दिनसम्म पनि विद्युत् महसुल नबुझाउने उपभोक्तालाई ४१औं दिनदेखि बिलको २५ प्रतिशतका दरले थप दस्तुर लाग्ने व्यवस्था छ । यसरी २५ प्रतिशतका दरले थप दस्तुर लागेको ६०औं दिनसम्म पनि बक्यौता महसुल नबुझाएमा लाइन काट्ने व्यवस्था छ ।
त्यस्तै लाइन काटेको ६ महिनासम्म पनि बक्यौता महसुल नबुझाउने उपभोक्ताहरुलाई कालोसूचीमा राखी असुली प्रक्रिया अगाडि बढाउने प्रावधान छ । र सोही प्रावधानमा टेकेर तिहारपछि लाइन काट्ने तथा महसुल असुलीको कार्यलाई थप प्रभावकारी बनाउने भन्दै प्राधिकरणले विद्युत महसुल तिर्न बाँकी रहेको ग्राहकलाई जिम्मेवार बन्न र महसुल बुझाउनसमेत आग्रह गरेको छ ।
