काठमाडौँ । एनसेल आजियाटा लिमिटेडले भूकम्प पीडितहरुलाई ५० लाख सहयोग गर्ने भएको छ । एनसेलले शक्तिशाली भूकम्पका कारण प्रभावित जाजरकोट र रुकुम पश्चिमका पीडितहरुका लागि तत्काल ५० लाख सहयोग गर्ने घोषणा गरेको हो । 

एक विज्ञप्ती जारी गर्दै एनसेलले भूकम्प पीडितको उद्धार, उपचार तथा राहतका लागि सहयोगार्थ ५० लाख रुपैयाँ उपलब्ध गराउने घोषणा गरेको हो । 

एनसेलले उक्त रकम कर्णाली प्रदेश सरकारमार्फत पीडितसम्म पुर्याउने जनाएको छ । त्यस्तै, एनसेलले भूकम्प प्रभावित क्षेत्रका ग्राहकलाई ४० लाख ब्यालेन्स बराबरको सेवाहरु निःशुल्क उपलब्ध गराउने घोषणा समेत गरेको छ । 

एनसेलमार्फत यसरी पाइने सेवाहरुमा देशका अन्य नेटवर्क र विदेशमा पनि फोन गर्न मिल्ने सेवा, डेटा र एसएमएस रहेका छन् । एनसेलको यस्तो सुविधाको समयसीमा १५ दिनको रहने छ ।

यसो त नेपाल टेलिकमले पनि भूकम्प प्रभावित क्षेत्र जाजरकोट, रुकुम पश्चिम र रुकुम पूर्वमा पाँचदिसम्म टेलिफोन र एसएमएस सेवा निःशुल्क उपलब्ध गराउने घोषणा यसअघि नै गरिसकेको छ । यसका लागि टेलिकमले पाँच दिनसम्मको निःशुल्क भ्वाइस र एसएमएस भएको सिमाकार्ड उपलब्ध गराउने काम अघि बढाइसकेको छ ।