काठमाडौँ । शिखर अर्गनाइजेसनका अध्यक्ष केदारनाथ शर्माले ९० करोड ऋण लिँदा १ प्रतिशतका दरले ९० लाख रुपैयाँ घुस बुझाएको भनी सीआईबीमा दिएको बयान अर्थ सरोकारले सार्वजनिक गरेपछि सतहमा आएको घुसकाण्डमा मुछिएका नेपाल एसबिआई बैंकका मेनेजरलाई बैंकलाई सुरुवाती कार्वाही गरेको छ । ऋणीसँग घुस खाएको विषयमा स्पष्टिकरण सोधिएकोमा उनलाई छानविन नसकिउन्जेलसम्मका लागि सबै जिम्मेवारीबाट हटाउनेगरी बैंकले कार्वाही गरेको हो ।
अहिले उनी काम गरिरहेको साबिकको शाखाबाट उनलाई बागमती प्रदेश कार्यालयमा सरुवा गरिएको छ । बैंकका साखा प्रबन्धक सन्तोष पुन:ले समेत साबिकका प्रबन्धक मनोज गौतमलाई बैंकले सरुवा गरिदिएको पुष्टी गरे । ‘अहिले मनोजजीले बोक्ने फोन मैले बोकेको छु । उहाँलाई बैंकले बागमती प्रदेश कार्यालयमा सरुवा गरिदिएको छ ।’ पुन:ले अर्थ सरोकारसँग भने, ‘अहिले उहाँ यो शाखामा हुनुहुन्न । उहाँले अहिले ९८५११३७**७ नम्बर बोक्नुहुन्छ ।’ यता सो नम्बरमा फोन गर्दा गौतमले फोन उठाएनन् ।
बागमती प्रदेश कार्यालयका एक उच्च अधिकारीले दिएको जानकारी अनुसार गौतमलाई बैंकले सबै जिम्मेवारीबाट हटाएको छ । ‘अहिले उहाँ अफिस आउनुहुन्छ, हाजिर गर्नुहुन्छ, दिनभरी बस्नुहुन्छ, खाजा खानुहुन्छ, अनि बेलुकी ५ बजेपछि घर जानुहुन्छ । उहाँका सबै युजरहरु हटाइएका छन् । उहाँले केहि पनि काम गर्न पाउनुहुन्न ।’ ती अधिकारीले अर्थ सरोकारसँग भने, ‘उनका बाँकी हिंडडुल पनि बैंकले वाच गरिरहेको छ ।’ उनका अनुसार गौतम बेलाबेला बाहिर मान्छे भेट्नसमेत जाने गरेका छन् । उनले फोनमा अन्य साथीहरुलाई पनि आफुलाई केदारले फसाएको भन्ने प्रतिक्रिया दिने गरेका छन् । केहि समय अघि अर्थ सरोकारसँग कुरा गर्दासमेत उनले आफुले घुस नखाएको दाबी गरेका थिए ।
यसो त यो छानविनका क्रममा देखिएका घटना लुकाउन गौतमलाई उनका सहपाठीहरुलेसमेत सहयोग गरेको देखिएको छ । घुस काण्डका छानविनका तथ्यबारे बोल्नुपर्ने डरले अहिले बैंकको कार्यालय समयमा अधिकांश समय बैंकका सूचना अधिकारी रितेश अर्यालले फोन अफ गर्ने गरेका छन् । हामीले शुक्रबार विहान १० बजेर ४० मिनेट, ११ बजेर १५ मिनेट, र ११ बजेर २१ मिनेटमा फोन गर्दा पनि अर्यालको फोन थियो । यसो त यसअघि पनि बैंकले सकेसम्म यो घटनालाई लुकाउने प्रयास गरेको थियो ।
यता बैंकले गरिरहेको छानविनमा संग्लग्न एक अधिकारीले उनले घुस नखाएको प्रमाणित हुने कुनै आधार नदेखिएको दाबी गरेका छन् । ‘यो चानचुने विषय होइन । सीआईबी र अदालतमा रेकर्ड भएको विषय हो । बैंकले यो विषय गम्भीर रुपमा लिएको छ । उनले घुस खाएनन् भन्ने प्रमाण उनले बुझाउन सकेका छैनन् । उनी सीआईबीमा केदारनाथ शर्माले गरेको बयानविरुद्ध पनि अदालत गएनन्, कुनै डिफेन्स गरेनन् । यसको अर्थ गहिरो छ ।’ ती अधिकारीले अर्थ सरोकारसँग भने, ‘अहिले उनलाई सबै जिम्मेवारीबाट हटाइएको छ । उनलाई के कार्वाही गर्ने भन्ने विषयमा निर्णय हुन बाँकी छ । सम्भवत: उनलाई बैंकबाट बिदा गर्नुपर्छ भन्ने लाइनमा नै बैंकले निर्णय गर्छ होला । डिफेन्स गर्नुको सट्टा छानविनका क्रममा उनलाई प्रश्न हरु सोध्दा उनी डाँको छोडेर रुने गरेका छन् ।’
बैंकका अनुसार उनलाई ‘अव उपरान्त कहिल्यै प्रमोसन नगर्नेगरी’ बैंकले कार्वाही गर्ने तयारी गरेको छ । यो तयारीबारे मोटामोटी थाहा पाएका उनी अर्को जागिरको खोजीमा छन् । तर उनलाई तत्काल कुनै बैंकले पत्याउने अवस्था छैन । त्यसैले पनि उनी तनावमा रहेको बुझिएको छ ।
