काठमाडौँ । नेकपा एमालेका सांसद तथा पूर्वमन्त्री गोकुल बास्कोटाले प्रायोजित हल्लाका कारण नेपाली सेयर बजार प्रभावित भएको बताएका छन् । शुक्रबार समाजिक सञ्जाल फेसबुकमा पोस्ट सार्वजनिक गर्दै सांसद बास्कोटाले यस्तो बताएका हुन् । 

बास्कोटाले अहिले नेपालको सेयर बजारमा प्रायोजित रुपमा हल्ला फैलाउँदै जनता झुक्याउने खेल भइरहेको उल्लेख गरेका छन् । 

त्यस्तै, बास्कोटाले केही ‘डन’हरुले नेपालको सेयर बजारलाई कब्जा गरेको पनि बताएका छन् । ‘प्रायोजित हल्ला मच्चायो, भाउ बढायो, जनतालाई किनायो । उसैगरी उल्टो हल्ला चलायो भाउ घटायो र जनताबाटै कौडीमा किनिदियो गरेर मात्र नेपालको सेयर बजारका केही डनहरुले सेयर बजार पुरै कब्जामा राखेका छन्, भन्छन् ।’, उनले लेखेका छन् ।

सँगै उनले नेपाली सेयर बजारमा वाईकोले मनपरी रुपमा बजार चलाएको पनि आरोप लगाएका छन् । शुक्रबार फेसबुकमा गरेको सोही पोस्टमार्फत सांसद बास्कोटाले सेयर बजारमा वाईकोको मनपरी  माथि प्रश्न उठाएका छन् । ‘वाइको भन्ने कम्पनीलाई मनपरी बजार चलाउने छुट कसले दियो ? जनता घाटामा, तीनजना नाफामा ?’, उनले लेखेका छन् । तर उनले अन्तिममा तीनजना भनेर कसलाई इंगित गरेका हुन् भन्ने खुलाएका छैनन् । 

यद्यपि बास्कोटाले भनेको तीनजना नेपाल स्टक एक्सचेन्ज (नेप्से), नेप्सेलाई कमिसन खुवाएर बजारमा चलखेल गर्ने वाइको र बजारमा इन्साइडर कारोबार गर्ने व्यक्ति भएको हुनसक्ने लगानीकर्ताले अनुमान गरेका छन् ।