काठमाडौँ । पशुपतिनाथ मन्दिर क्षेत्रमा मासु, मदिरा र नशालु पदार्थको सेवन, बिक्रीवितरण तथा भण्डारमा निषेध गरिएको छ । बिहीबार एक सूचना जारी गर्दै जिल्ला प्रशासन कार्यालय काठमाडौँले पशुपति क्षेत्रमा मदिरा, मासु र नशालु पदार्थमा प्रतिबन्ध लगाइएको जनाएको हो ।

बालाचतुर्दशी पर्वलाई मध्यनजर गर्दै २१ मंसिर (बिहीबार) देखि २७ मंसिरसम्म पशुपति क्षेत्रमा मदिरा, मासु र नशालु पदार्थमा निषेध लगाइएको जिल्ला प्रशासन कार्यालय काठमाडौँले जनाएको छ ।

प्रशासनले पशुपति क्षेत्रमा चार किल्ला तोकेरै यस्ता वस्तुको प्रयोग तथा बिक्रीवितरणमा रोक लगाएको हो । प्रशासन कार्यालयका अनुसार गौशाला मित्रपार्क सडकदेखि पूर्व, पशुपति क्षेत्रको पूर्व सिमानादेखि पश्चिम, गौशाला तिलगंगा चक्रपथदेखि उत्तर र मित्रपार्क–उमाकुण्ड–गौरीघाट हुँदै गुह्येश्वरीदेखि दक्षिण भित्रका सबै भागमा मासु, मदिरा र नशालु पदार्थ निषेध गरिएको छ ।

निषेधित क्षेत्रमा निषेधित पदार्थको उत्पादन, बेचबिखन, ओसारपसार, भण्डार र सेवन गरेको पाइए कानून बमोजिम कारवाही हुने पनि सूचनामा उल्लेख छ ।