काठमाडौँ । साताको कारोबारको पहिलो दिन नै सेयर बजारमा ‘पोजेटिभ सर्किट’ लागेको छ । यो नेपालको सेयर बजारमा धेरै पछि देखिएको ‘पोजेटिभ सर्किट’ हो ।
आइतबार नेप्सेमा बजार खुलेको ५ मिनेट ४८ सेकेण्डमै बजार ४ प्रतिशतले बढेपछि कारोबार बन्द भएको छ । २० मिनेटका लागि बन्द भएको बजार २० मिनेटपछि पुनः खुल्नेछ ।
सेयर बजारमा वर्षौंपछि ‘पोजेटिभ सर्किट’ लाग्नुमा मौद्रिक नीतिका समीक्षा मुख्य कारण हो । शुक्रबार राष्ट्र बैंकले सार्वजनिक गरेको मौद्रिक नीतिको पहिलो त्रैमासको समीक्षामा सेयर धितो कर्जाको जोखिम भार घटाएर १२५ प्रतिशत कायम गरिएको थियो । अर्थात यसअघि ५० लाखभन्दा धेरै रकमको सेयर धितो कर्जाको जोखिम भार १५० प्रतिशत रहेकोमा अब १२५ प्रतिशत रहनेछ ।
