काठमाडौँ । लघुवित्त वित्तीय संस्थामा ऋणीहरुको संख्या घटेको छ । नेपाल राष्ट्र बैंकको लघुवित्त वित्तीय संस्था सुपरीवेक्षण विभागले प्रकाशित गरेको चालु आर्थिक वर्षको दोस्रो त्रैमाससम्मको रिपोर्ट अनुसार देशभर लघुवित्त वित्तीय संस्थाहरुमा ऋणीको संख्या ८.३३ प्रतिशतले घटेको हो ।
राष्ट्र बैंकका अनुसार यसअवधिमा लघुवित्त ऋणीको संख्यासँगै लघुवित्तको संख्या पनि घटेको छ । २०७९ पुषसम्म देशभर ६४ वटा लघुवित्त वित्तीय संस्था रहेकोमा हाल ५७ वटा मात्रै रहेका छन् ।
समीक्षा अवधिमा लघुवित्तमा ऋणीसँगै सदस्य संख्या पनि घटेको छ । यसअवधिमा लघुवित्त वित्तीय संस्थाहरुको सदस्य संख्या ०.२२ प्रतिशतले घटेर ६० लाख ३ हजार पुगेको छ । हाल देशभर लघुवित्त वित्तीय संस्थाहरुमा २७ लाख ३६ हजार ऋणीहरु रहेका छन् । जुन गत आर्थिक वर्षको तुलनामा ८.३३ प्रतिशत कम हो ।
त्यस्तै, पुष मसान्तसम्ममा खुद्रा कर्जा प्रदायक लघुवित्त वित्तीय संस्थाहरुको निष्क्रिय कर्जामा वृद्धि भएको राष्ट्र बैंकको रिपोर्टले देखाएको छ । राष्ट्र बैंकका अनुसार यसअवधिमा लघुवित्तहरुको निष्क्रिय कर्जा २८ अर्ब ८९ करोड अर्थात ७.४९ प्रतिशत रहेको छ । यसअघि असार मसान्तसम्म लघुवित्तहरुको निष्क्रिय कर्जा ५.५२ प्रतिशत रहेको थियो ।
