">
काठमाडौँ । नेकपा एमालेका सांसद रघुजि पन्तले व्यवसायी दुर्गा प्रसाईंको ‘बडिगार्ड’को हतियारबारे छानविन गर्न माग गरेका छन् । बुधबार राज्य व्यवस्था समितिको बैठकमा सुरक्षा संयन्त्रमाथि प्रश्न उठाउँदै उनले प्रसाईंको ‘बडिगार्ड’ले प्रयोग गरेको हतियारबारे छानविन गर्न माग गरेका हुन् ।
उनले गृहमन्त्री रवि लामिछानेलाई प्रश्न गर्दै मेडिकल व्यवसायी दुर्गा प्रसाईंका सुरक्षा गार्डले बोकेको हतियारको लाइसेन्स दिने प्रावधान नभएको भन्दै छानविन गर्न माग गरेका छन् ।
‘दुर्गा प्रसाईंका सुरक्षा गार्डले बोकेको हतियारका लागि लाइसेन्स दिने प्रावधान छ कि छैन ? संसारमा निहत्था नागरिकको हत्याका घटनाहरुलाई ध्यानमा राखेर हाम्रो सुरक्षा व्यवस्था कडा बनाउनुपर्छ । यस्ता हतियारहरु कति जनालाई दिइएको छ ? कति हजारको संख्यामा छ ?’, गृहमन्त्रीसँग जवाफ माग्दै पन्तले भने, ‘त्यस्ता हतियार फिर्ता दिने विषयलाई गृहले कति गम्भीर रुपमा लिएको छ ?’
त्यस्तै, सांसद पन्तले प्रसाईंलाई दिइएको हतियारको प्रकार हेर्दा हतियारको लाइसेन्स जारी गर्ने नीतिमाथि पुर्नविचार गर्नुपर्ने उल्लेख गरेका छन् । कुनै पनि नागरिकले आफ्नो सुरक्षाका लागि हतियार बोक्नुपर्ने अवस्था नहुनेगरि गृह मन्त्रालयले सुरक्षा प्रबन्ध गर्नुपर्ने पन्तको भनाइ छ ।
