काठमाडौँ । सर्वोच्च अदालतले व्यवसायी दुर्गा प्रसाईंका बडिगार्ड पक्राउ गरेको विषयमा सरकारसँग जवाफ मागेको छ । बडिगार्डको तर्फबाट सर्वोच्च अदालतमा दायर गरिएको बन्दी प्रत्यक्षिकरणको रिटमाथि सुनुवाई गर्दै सर्वोच्चले बडिगार्ड पक्राउबारे सरकारसँग लिखित जवाफ मागेको हो ।
उक्त रिटमाथि सुनुवाई गर्दै न्यायाधीश महेश शर्मा पौडेलले तीन दिनभित्र लिखित जवाफ पेश गर्न सरकारका नाममा आदेश जारी गरेका छन् ।
सोमबार दुर्गा प्रसाईंसँग सम्बन्धित मुद्दाको सुनुवाईका लागि अदालत पुगेका प्रसाईंका बडिगार्ड दीपक खड्का र रामकुमार धिमाललाई प्रहरीले पक्राउ गरेको थियो । उनीहरुको साथबाट प्रहरीले बन्दुगसमेत बरामद गरेको थियो । पक्राउ परेका दुवैजनाविरुद्ध थप अनुसन्धान गरी मुद्दा चलाउन जिल्ला अदालत काठमाडौँले ५ दिन हिरासतमा राख्न अनुमति दिएको छ ।
पक्राउ परेका प्रसाईंका बडिगार्ड धिमालका तर्फबाट रिया राजवंशीले गृह मन्त्रालय सिंहदरबारसहित विभिन्न ७ वटा सरकारी निकायलाई विपक्षी बनाउँदै बन्दी प्रत्यक्षीकरणको रिट दायर गरेकी थिइन् भने दीपक खड्काको तर्फबाट उनकी श्रीमती शान्ता खड्काले बन्दी प्रत्यक्षीकरणको रिट दायर गरेकी थिइन् ।
