काठमाडौँ । नेपाल इन्जिनियरिङ कलेजका तत्कालीन अध्यक्ष लम्बोदर न्यौपाने सम्पत्ति शुद्धीकरणको मुद्दामा दोषी ठहर भएका छन् । विशेष अदालतका अध्यक्ष टेकनारायण कुँवर र सदस्य रामबहादुर थापाको संयुक्त इजलाशले न्यौपानेलाई सम्पत्ति शुद्धीकरणको मुद्दामा दोषी ठहर गरेको हो ।

उनीविरुद्ध सम्पत्ति शुद्धीकरणले कलेजको सम्पत्ति गैरकानूनी रुपमा आफ्नो नाममा राख्ने निर्णय गरेको भन्दै विशेष अदालतमा मुद्दा दायर गरेको थियो ।

सामाजिक संस्थाको १२ करोड ८४ लाख ८७ हजार रुपैयाँ गैरकानूनी रुपमा अपचलन गरेको अभियोगमा दोषी ठहर गर्दै अदालतले २०८१ बैशाख १६ गते न्यौपानेमाथि सजाय निर्धारणका लागि पेशी तोक्न आदेश दिएको छ ।

न्यौपानेले उक्त कलेजको नाम मिल्ने गरी कम्पनी रजिष्ट्रारको कार्यालयमा आफ्नो नाममा प्राइभेट कम्पनी दर्ता गरी कलेजको चल–अचल सम्पत्ति र दायित्व समेत सो कम्पनीमा सार्ने प्रयत्न गरेको समेत देखिन आएकोले न्यौपानेले सम्पत्ति शुद्धीकरणको कसुर गरेको पुष्टि हुने अदालतको फैसलाको रायमा उल्लेख गरिएको छ । त्यसका साथै न्यौपानेले कलेजको तलब, भत्ता, गाडी र अन्य सुविधाका नाममा पनि रकम दुरुपयोग गरेको विशेष अदालतले ठहर गरेको छ ।