काठमाडौं । सहकारी ठगी प्रकरणमा छानविन समिति बनाएर कारवाही गर्न नेपाली एकीकृत समाजवादी पार्टीले माग गरेको छ । बालकुमारीमा बसेको पार्टीको बैठकले छानबिन समिति बनाएर दोषीमाथि कारबाही गर्न माग गरेको हो ।

एकीकृत समाजवादीको ८औं बैठकले सहकारी संस्थाले अधिकारको दुरुपयोग गरी सर्वसाधारणको बचत अपचलन गरेको निष्कर्ष निकालेको छ । ‘कतिपय सहकारी संस्थाले अधिकारको दुरुपयोग गरी सर्वसाधारण जनताको बचत अपचलन गरेर ठुलो धनराशि दुरुपयोग गरी आर्थिक तथा वित्तीय अपराध गरेको दुःखद घटनाहरू सार्वजनिक भइरहेका छन् । यस सम्बन्धमा गृहमन्त्रीको समेत संलग्नताको समाचार प्रकाशित भएको छ । यो बैठक समग्र समस्या समाधानको लागि छानबिन समिति गठन गरी दोषीमाथि कडा कारबाही गरियोस् भन्ने माग गर्दछ,’ प्रस्तावमा भनिएको छ ।

उक्त बैठकले १८ बुँदे प्रस्तावहरू पारित गरेको छ । प्रस्तावमा सहकारी ठगी प्रकरणदेखि रुस युक्रेन युद्धमा सहभागी भएका नेपालीहरूको विषयहरू उठान गरिएको थियो।