काठमाडौँ । सहकारी ठगी प्रकरणमा संसदीय छानबिन समिति गठनबारे सत्तापक्षका दलहरूसँगको वार्ता सकारात्मक भएपछि नेपाली कांग्रेसका सभापति शेरबहादुर देउवाले विपक्षी दलहरूको बैठक बोलाएका छन् । सहकारी ठगी प्रकरणमा नेपाली कांग्रेसले संसदमा उठाएको विषयमा साथ दिएका दलहरुलाई देउवाले छलफलमा बोलाएका हुन् ।
सत्तापक्षसँगको वार्ता सकारात्मक भए पनि विपक्षी दलहरुसँगको छलफलपछि मात्रै के गर्ने ? भन्ने निर्णयमा नेपाली कांग्रेस पुग्नेछ । विपक्षी दलहरुको बैठक जेठ १५ गते (मंगलबार) बिहान १० बजे संसद् भवनमा देउवाको कार्यकक्षमा बस्नेछ ।
बैठकमा राष्ट्रिय प्रजातन्त्र पार्टी, जनता समाजवादी पार्टी (जसपा), लोसपा र राष्ट्रिय जनमोर्चाका नेताहरूलाई बोलाइएको छ । संसद्को बजेट अधिवेशन प्रारम्भ भएदेखि नै निरन्तर संसद् अवरोध गर्दै आएको कांग्रेसले मंगलबार सरकारले बजेट पेश गर्ने कार्यक्रम रहेकोमा सो बैठकमा कसरी प्रस्तुत हुने भन्ने विषयमा सहमतिका लागि छलफल गरिरहेको छ ।
बजेट पेश गर्ने कार्यसूचीसहित संघीय संसद्का दुवै सदनको बैठक दिउँसो १ बजेका लागि बोलाइएको छ । बैठकमा अर्थमन्त्री वर्षमान पुनले सरकारको आगामी आर्थिक वर्षको बजेट पेश गर्ने कार्यसूची छ ।
यता सत्तापक्षसँगको छलफल सकारात्मक रहेको र आजै ७ सदस्यीय संसदीय छानबिन समिति गठन गर्नुका साथै आजै कार्यादेशसमेत टुंगो लगाउने तयारी गरेको भनिरहँदा विपक्षी दलका केही नेताहरुले भने समिति बनाउने विषयमा आपत्ति जनाएका छन् । कार्यादेशमा गृहमन्त्री रवि लामिछानेको नाम उल्लेख नगरी हिनामिना भएका सहकारी संस्था र गोर्खा मिडिया नेटवर्क लगायत निश्चित कम्पनीको नाम उल्लेख गरेर समिति गठन गर्ने भनेपछि केहीले भने गृहमन्त्रीको नामै उल्लेख गर्नुपर्ने अडान लिएका छन् । यद्यपि संसदको गतिरोध हट्ने वा नहट्नेबारे विपक्षी दलको बैठकले निर्णय गर्नेछ ।
