">
काठमाडौँ । श्रम, रोजगार तथा सामाजिक सुरक्षा मन्त्रालयले कल सेन्टर सञ्चालनमा ल्याएको छ । मन्त्रालयले श्रम तथा रोजगारसँग सम्बन्धित सम्पूर्ण गुनासो सुन्न र समस्यालाई सम्बोधन गर्न कल सेन्टर सञ्चालनमा ल्याएको हो ।
श्रममन्त्री डोलप्रसाद अर्यालले वैदेशिक रोजगारीमा जाने श्रमिकका समस्यालाई प्राथमिकता दिएर श्रमाधान कल सेन्टर सञ्चालन ल्याएको जानकारी दिएका छन् ।
उनले भने, ‘श्रमाधान मन्त्रालयको यस्तो वृहत र व्यवहारिक योजना हो, जसले नागरिकको श्रम र रोजगारसम्बन्धी बहुआयामिक एकद्वार प्रणालीद्वारा सम्बोधन गर्ने योजना राखेको छ ।’
नागरिकले यसअघि आफूले श्रमसँग अनेक समस्या लिएर विभिन्न निकाय धाउनुपर्ने बाध्यता रहेको र मन्त्रालयले श्रमाधानको सञ्चालन गरेसँगै अब सम्पूर्ण श्रमिकले एकै स्थानबाट सम्पूर्ण समस्याका समाधान पाउने मन्त्रालयको दाबी छ । श्रमिकहरूले श्रमधानमा गुनासो गर्नका लागि वैदेशिक रोजगार बोर्डमा रहेको कल सेन्टरमा पुगेर आफ्नो समस्या राख्न सक्छन् भने अन्य विभिन्न माध्यमबाट समेत गुनासो गर्नसक्ने मन्त्रालयले व्यवस्था गरेको छ ।
मन्त्री अर्यालले भने, ‘नागरिकले विद्युतीय माध्यम ट्याब्लेट, टेलिफोन, मोबाइल, स्मार्ट टिभी, स्मार्ट वाच लिखित, मौखिक, ध्वनि, श्रव्य, श्रव्यदृश्य आदि माध्यमको प्रयोग गरेर श्रमाधानमा गुनासो, जिज्ञासा, समस्या र सुझाव सम्प्रेषण गर्न सक्नेछन् । सामाजिक सञ्जाल फेसबुक, ह्वाट्सएप, भाइबर, इमो, इन्स्टाग्राम, इमेल, एक्स, सिग्नल बाट पनि गुनासो दर्ता गर्न सक्नेछन् ।’
