काठमाडौँ । श्रम, रोजगार तथा सामाजिक सुरक्षा मन्त्रालयले श्रम तथा रोजगारीसँग सम्बन्धित श्रमधान योजना घोषणा गरेको छ । अन्तर्राष्ट्रिय श्रमिक दिवसको अवसर पारेर मन्त्रालयमा बुधबार आयोजित एक कार्यक्रमकाबीच मन्त्रालयले यस्तो घोषणा गरेको हो ।
श्रममन्त्री डोल प्रसाद अर्यालले श्रमधान योजनाले नेपाल र विदेशमा रहेको नेपाली श्रमिकको सबै खालको समस्या एकद्वार प्रणालीबाट समाधान गर्ने जानकारी दिएका छन् । उनले भने, ‘मन्त्रालयले अहिले सञ्चालन गरेको कल सेन्टरको काम सीमित भयो । त्यसैले वृहत रुपमा श्रमिकको समस्या समाधान देखि जिज्ञासा, सुझाव तथा गुनासोलाई सम्बोधन गर्ने गरी यो योजना सञ्चालन गरिएको हो ।’
श्रमदानको पहिलो चरणमा सातवटा क्षेत्रहरूसँग सम्बन्धित कार्यक्रमहरू समावेश गरिएका छन् । श्रममन्त्री डोल प्रसाद अर्यालले इन्द्रेणीका सात रगंहरुसँग मेल खाने गरी प्रत्येक कार्यक्रमहरूलाई एक विशेष रगंसँग जोडिएको बताएका छन् ।
श्रमधान योजनाको पहिलो कार्यक्रम ‘सेकेन्ड इनिङ’, दोस्रोमा ‘रोजगार बैंक’, तेस्रोमा ‘समता’ कार्यक्रम, चौथोमा ‘कानुन’ कार्यक्रम, पाँचौमा ‘कनेक्ट’ कार्यक्रम, छैटौँमा ‘साथ’ कार्यक्रम र सातौँमा ‘कल सेन्टर’ कार्यक्रम रहेको छ ।
श्रमधान योजना भित्रका सात कार्यक्रमलाई क्रमिक रुपमा सञ्चालनमा ल्याइने मन्त्रालयले जनाएको छ ।
