काठमाडौँ । कैलालीमा ट्राफिक प्रहरीले ‘चालकसँग १ मिनेट अन्तरक्रिया’ कार्यक्रम सम्पन्न गरेको छ । कैलालीको धनगढी उपमहानगरपालिका-१९ स्थित अस्थायी ट्राफिक प्रहरी पोष्ट फुलवारीले ‘चालकसँग १ मिनेट अन्तरक्रिया’ कार्यक्रम गरेको हो ।
सवारी चालकलाई ट्राफिक नियम सिकाउने र सडक दुर्घटना न्यूनिकरण गर्ने मुख्य उद्देश्यसहित उक्त कार्यक्रम सम्पन्न गरिएको अस्थायी प्रहरी पोष्ट फुलवारीका इन्चार्ज तथा प्रहरी हवल्दार शिद्धराज विष्टले बताएका छन् ।
विष्टका अनुसार ‘चालकसँग १ मिनेट अन्तरक्रिया’ कार्यक्रममा सडकमा हिँडिरहेका बाईक, अटोरिक्सा, ट्याक्टर लगायतका सवारी रोकेर चालकलाई १ मिनेट ट्राफिक नियमबारे बुझाइएको छ ।
गाउँगाउँमा भेला गराएर ट्राफिक नियमबारे प्रशिक्षणसमेत गरिरहेको अस्थायी प्रहरी पोष्ट फुलवारीले निश्चित ठाउँमा गरिने प्रशिक्षणले सबैलाई समेट्न नसकिने भन्दै सडक प्रयोग गर्ने यात्रु तथा सवारी चालकलाई सडकमै रोकेर १ मिनेट ट्राफिक नियम, सडक प्रयोग गर्दा ध्यान दिनुपर्ने कुरा तथा सडक दुर्घटनाबाट जोगिन अपनाउनुपर्ने उपायबारे प्रशिक्षण दिइएको प्रह विष्टले बताएका छन् ।
