काठमाडौं। आकर्षक तलबको प्रलोभनमा पारेर विभिन्न देश पठाइदिने भन्दै रकम ठगी गर्ने दुई जना पक्राउ परेका छन्। पक्राउ पर्नेमा ३३ वर्षीय जीवन कडरिया र ४६ वर्षीय चूडा बहादुर खड्का रहेका छन्। 

उनीहरूलाई काठमाडौं उपत्यका अपराध अनुसन्धान कार्यलयबाट खटिएको प्रहरी टोलीले पक्राउ गरेको हो। 

पक्राउ परेका जीवन कडरियाले क्यानडा पठाइदिने भन्दै ४ लाख २० हजार ठगी गरेका थिए भने चूडा बहादुर खड्काले ३ जनालाई कोरिया पठाइदिने भन्दै १७ लाख ठगी गरेको प्रहरीले जनाएको छ। 

हाल पक्राउ परेका उनीहरूलाई थप अनुसन्धान तथा आवश्यक कारवाहीका लागि वैदेशिक रोजगार विभाग पठाइएको छ।