काठमाडौँ । प्रधानमन्त्री केपी शर्मा ओलीले अहिलेको सरकार भ्रष्टाचार नियन्त्रणका नाममा स्टन्टबाजी गर्न र भ्रष्टाचार छोप्ने काममा नलाग्ने दाबी गरेका छन् । आइतबार पार्टी केन्द्रीय कार्यालय च्यासलमा आयोजित एमालेनिकट नेपाल खेलकुद महासंघ केन्द्रीय कमिटीको तेस्रो बैठकमा बोल्दै उनले यस्तो बताएका हुन् । 

ओलीले सरकार भ्रष्टाचारका घटना खोजबिन गर्ने र कारबाही गर्ने कामको लागि बनेको भन्दै सरकारले भ्रष्टाचारप्रति शून्य सहनशीलता राख्ने पनि उल्लेख गरेका छन् । 

‘अहिलेको सरकार भ्रष्टाचार नियन्त्रणका लागि बनेको हो । भ्रष्टाचार नियन्त्रणका नाममा स्टन्टबाजी गर्ने र भ्रष्टाचार छोप्ने काम गर्नका लागि होइन ।’, प्रधानमन्त्री ओलीले भने, ‘भ्रष्टाचार खोजबिन र कारबाही गर्ने कामको लागि बनेको सरकारले भ्रष्टाचारप्रति शून्य सहनशीलता राख्छ । समयक्रममा व्यवहारमा देखिँदैजान्छ ।’

त्यस्तै, प्रधानमन्त्री ओलीले न्याय र कानून सबैका लागि भएकाले अनुहार हेरेर कुनै पनि व्यवहार नगर्ने बताएका छन् । ‘न्याय सबैको लागि र कानून सबैका लागि हो । अनुहार र मान्छेको मुख हेरेर कुनैपनि व्यवहार गरिँदैन । कानूनले व्यवहार गर्छ ।’, उनले भने, ‘हामी एउटा सुशासनयुक्त, समृद्ध, आधुनिक, शान्तिपूर्ण सुखी नेपाल र आनन्दको नेपाल बनाउन चाहन्छौँ ।’

सँगै ओलीले जो भ्रष्ट छ उसले भ्रष्टाचार विरोधी नाराको नाटक गरेर जनता अल्मल्याउने काम गरेको समेत उल्लेख गरेका छन् ।