">
काठमाडौँ । प्रधानमन्त्री नरेन्द्र मोदीको पोल्यान्ड भ्रमणले भारत-पोल्यान्ड सम्बन्धलाई नयाँ उचाइमा पुर्याएको छ । यो ऐतिहासिक भ्रमण पोल्यान्डको राजधानी वारसामा सम्पन्न भयो, जहाँ भारत र पोल्यान्डबीचको द्विपक्षीय सम्बन्धलाई ‘रणनीतिक साझेदारी“ को स्तरमा उन्नयन गरियो। सन् १९५४ मा कूटनीतिक सम्बन्ध स्थापना भएदेखि नै दुवै राष्ट्रबीचको सम्बन्धमा यो एक महत्वपूर्ण माइलस्टोन मानिएको छ ।
दुई दिनको यो भ्रमणमा प्रधानमन्त्री मोदीले पोल्याण्डका प्रधानमन्त्री डोनाल्ड टस्कसँग भेटवार्ता गरे। यस क्रममा दुवै देशका नेताहरूले पाँच वर्षे कार्ययोजना (२०२४-२०२८) को घोषणा गरे, जसमा रक्षा, व्यापार, कृषि प्रविधि, ऊर्जा, हरित प्रविधि, पूर्वाधार, औषधि, र खानी क्षेत्रमा सहयोगको सम्भावना रहेका छन् ।
प्रधानमन्त्री मोदीले सामाजिक सुरक्षा सम्झौतामा हस्ताक्षर गरे, जसले श्रमिकहरूको कल्याण र दुवै देशबीचको जनशक्ति आदानप्रदानलाई प्रवर्द्धन गर्नेछ । साथै, उनले पोल्यान्डलाई सन् २०२२ मा युक्रेनबाट भारतीय विद्यार्थीहरूको उद्धारका क्रममा देखाएको सहयोगको लागि धन्यवाद दिए ।
यो भ्रमणको अर्को प्रमुख उपलब्धि रक्षा क्षेत्रमा सहकार्य विस्तार गर्ने प्रतिबद्धता हो । पोल्यान्डले भारतको रक्षा उत्पादन र सेना आधुनिकीकरणमा महत्वपूर्ण साझेदार बन्ने इच्छा व्यक्त गरेको छ । दुवै देशले साइबर सुरक्षा, कृत्रिम बुद्धिमत्ता, र डिजिटल अर्थतन्त्रको क्षेत्रमा पनि सहयोगको सम्भावनालाई बलियो बनाउन सहमति जनाएका छन् ।
प्रधानमन्त्री मोदीले पोल्यान्डका राष्ट्रपति आन्द्रेज दुदासँग भेटवार्ता गरे, जहाँ उनीहरूले द्विपक्षीय व्यापार र सांस्कृतिक सम्बन्धलाई अझ प्रगाढ बनाउने विषयमा छलफलसमेत गरेका छन् । पोल्यान्डका इन्डोलजिस्टहरूसँगको भेटमा प्रधानमन्त्री मोदीले भारतीय संस्कृतिप्रति उनीहरूको अध्ययन र योगदानको प्रशंसा गरे ।
यो भ्रमणले केवल कूटनीतिक सम्बन्धहरूलाई मात्र होइन, सांस्कृतिक, सामाजिक, र आर्थिक क्षेत्रहरूमा पनि दुवै देशका जनताबीचको सम्बन्धलाई अझ सुदृढ बनाउनेछ । यसले भारत–पोल्यान्ड सम्बन्धलाई नयाँ उचाइमा पुर्याउँदै वैश्विक परिदृश्यमा उनीहरूको भूमिकालाई थप महत्वपूर्ण बनाएको छ ।
