काठमाडौँ । निर्मला हत्या प्रकरणबारे सनसनीपूर्ण अन्तर्वार्ता दिएका व्यक्ति पक्राउ परेका छन् ।
प्राइम टाइम टेलिभिजनको ‘जनता जान्न चाहन्छन्’ कार्यक्रममा निर्मला पन्त हत्या प्रकरणमा आफू प्रत्यक्षदर्शी भएको भन्दै अन्तर्वार्ता दिएका नवराज अर्याललाई प्रहरीको केन्द्रीय अनुसन्धान ब्युरो (सीआईबी)ले पक्राउ गरेको हो ।
अर्याललाई पक्राउ गरिएको सीआईबीका उच्च अधिकारीले पुष्टि गरेका छन् । तर, अन्तर्वार्तामा अर्यालले उक्त प्रकरणबारे गलत विवरणसहित दुष्प्रचार गरेको भन्दै अर्याललाई पक्राउ गरिएको सीआईबीका एसपी होबिन्द्र बोगटीले बताएका छन् ।
अर्यालले अन्तर्वार्ताका क्रममा आफू खानेपानी विभागको सवारी चालकको रुपमा कञ्चनपुर गएका बेला निर्मलाको बलात्कार हुँदै गरेको देखेको बताएका थिए । तर, अन्तर्वार्तामा अर्यालले दाबी गरेको विवरण झुठो भएको सीआईबीले बताएको छ । यता अन्तर्वार्ता लिने कार्यक्रम प्रस्तोता ऋषि धमलालाई पनि सीआईबीले कार्यालयमा बोलाएको छ ।
