काठमाडौँ । सर्वोत्तम सिमेन्टले चालु आर्थिक वर्षको पहिलो त्रैमासिक रिपोर्ट सार्वजनिक गरेको छ । कम्पनीले सार्वजनिक गरेको रिपोर्ट अनुसार असोज मसान्तसम्म कम्पनीले २ करोड २५ लाख रुपैयाँ नोक्सानी व्यहोर्नु परेको छ ।

कम्पनीले गत आर्थिक वर्षको सोही अवधिमा १७ करोड ३८ लाख रुपैयाँ नाफा कमाएको थियो ।

समीक्षा अवधिमा कम्पनीको सञ्चालन आम्दानी पनि ७७.१६ प्रतिशतले घटेर १ अर्ब ४५ करोड रुपैयाँमा झरेको छ । कम्पनीे गत आर्थिक वर्षमा ६ अर्ब ३७ करोड रुपैयाँ सञ्चालन आम्दानी गरेको थियो ।

त्यस्तै, कम्पनीको बिक्री लागत पनि ७६.०४ प्रतिशतले घटेर १ अर्ब ३३ करोड ४८ लाख रुपैयाँमा सिमित भएको छ । सञ्चालन आम्दानी र बिक्री लागत दुवै घटेपछि कम्पनीले नोक्सानी व्यहोरेको हो । यसअवधिमा कम्पनीको प्रतिसेयर आम्दानी (ईपीएस) १ रुपैयाँ ९४ पैसा ऋणात्मक रहेको छ भने प्रतिसेयर नेटवर्थ १ सय ९८ रुपैयाँ ३३ पैसा छ ।