काठमाडौँ । पूर्वगृहमन्त्री एवं राष्ट्रिय स्वतन्त्र पार्टी (रास्वपा)का सभापति रवि लामिछाने पक्राउ विरोधमा आज पनि विरोध प्रदर्शन हुने भएको छ । प्रदर्शन जारी रहनेबारे पार्टीका कार्यवाहक प्रवक्ता मनिष झाले जानकारी दिएका छन् ।
झाका अनुसार बुधबार दिउँसो ४ बजे पोखराको मानवअधिकार चोकसहित विभिन्न जिल्लामा विरोध कार्यक्रम गरिने भएको छ ।
पोखराको सूर्यदर्शन सहकारी ठगी प्रकरणमा रवि लामिछानेलाई प्रहरीले कात्तिक २ गते काठमाडौँस्थित पार्टीको केन्द्रीय कार्यालयबाटै पक्राउ गरेको हो । उनीमाथि तेस्रो पटक म्याद थपका क्रममा कास्की जिल्ला अदालतले १० दिन हिरासतमा राखेर अनुसन्धान गर्न अनुमति दिएको छ ।
मङ्गलबार पोखरामा भएको प्रदर्शनका क्रममा निषेधित क्षेत्र तोडेको भन्दै प्रहरीले रास्वपाका १५ जना नेता तथा कार्यकर्तालाई नियन्त्रणमा लिएको थियो भने भीड नियन्त्रण गर्न ४ राउण्ड अश्रुग्यास प्रहार गरेको थियो । लामिछानेको पक्राउविरुद्ध रास्वपाले निरन्तर विरोध प्रदर्शन गर्दै आइरहेको छ ।
