काठमाडौँ । चार्टर्ड एकाउन्टेन्ट कृष्णप्रसाद दाहाल इंग्ल्याण्ड र वेल्सको चार्टर्ड एकाउन्टेन्ट इन्स्टिच्युट (आईसिएइडब्लु) को काउन्सिल सदस्यको रूपमा चयन भएका छन् । उनी सन् २०२५ देखि आगामी चार वर्षका लागि काउन्सिल सदस्यमा चयन भएका हुन् ।
दाहाल १२५ सदस्य रहेको विश्वव्यापी काउन्सिलको सदस्य बन्ने पहिलो नेपाली नागरिक हुन् ।
उनले उक्त भूमिकामा अडिट र आश्वासन फ्याकल्टीको प्रतिनिधित्व गर्नेछन् । इंग्ल्याण्ड र वेल्सको चार्टर्ड एकाउन्टेन्ट इन्स्टिच्युट (आईसिएइडब्लु) एक उच्चतम पेशेवर लेखा संस्था हो, जसले लेखा र वित्तीय क्षेत्रमा संसारकै सबैभन्दा समृद्ध प्राविधिक स्रोतहरूलाई समेटेको छ । आईसिएइडब्लुले विश्वभरिका चार्टर्ड एकाउन्टेन्ट र विद्यार्थीहरूलाई प्रवर्द्धन, विकास र समर्थन गर्दछ । डिसेम्बर २०२३ सम्म यसको २,०८,००० भन्दा बढी सदस्य र विद्यार्थीहरू १४६ देशहरूमा रहेका छन् । आईसिएइडब्लु सन् १८८० मा एक ब्रिटिश रोयल चार्टरद्वारा स्थापित भएको हो ।
यो संस्था चार्टर्ड एकाउन्टेन्ट्स वर्ल्डवाइड (CAW) को संस्थापक सदस्य पनि हो, जुन एक अन्तर्राष्ट्रिय लेखा संस्थाहरूको नेटवर्क हो । जसले १९० भन्दा बढी देशहरूमा १.८ मिलियन भन्दा बढी सदस्य र विद्यार्थीहरूको प्रतिनिधित्व गर्दछ ।
काउन्सिल चयन भएका दाहालले युके च्याप्टर, द इन्स्टिच्युट अफ चार्टर्ड एकाउन्टेन्ट्स अफ इण्डियाका अध्यक्षको रूपमा र ACCA- हारो नेटवर्क प्यानलको अध्यक्षको रूपमा जिम्मेवारी निभाइसकेका छन् । उनी Focus Somar Audit & Tax Accountants UK का प्रबन्ध साझेदार हुन् भने Ballards Newman, Chartered Accountants का पनि प्रबन्ध साझेदार हुन् ।
