काठमाडौँ । सिमेन्टको मूल्य २० प्रतिशतले बढेको छ । सिमेन्ट उद्योगीहरुले सिमेन्ट भाउ प्रतिबोरा १ सय रुपैयाँले बढाएका हुन् ।
योसँगै यसअघिसम्म प्रतिबोरा ५ सय रुपैयाँ पर्ने सिमेन्टलाई अब भने ६ सय रुपैयाँ पर्नेछ ।
यता निर्माण व्यवसायीहरुले भने सिमेन्टको मूल्यमा ‘कार्टेलिङ’ भएको आरोप लगाएका छन् । विगत एक वर्षदेखि उद्योगीहरुले सिमेन्टको भाउ बढाउन खोजे पनि केही सिमेन्ट उद्योग भाउ बढाउन तयार नभएपछि सिमेन्टको भाउ बढाउने प्रयासमा सिमेन्ट उद्योगहरु असफल भएका थिए ।
तर, यसपालि अधिकांश ठूला उद्योगहरुको मिलेमतोमा मूल्यवृद्धिसहित सिमेन्टको मूल्य तय भएको व्यवसायीको भनाई छ ।
अर्कोतर्फ सिमेन्ट उद्योगहरुले भने विगतमा सिमेन्टको मूल्यमा एकरुपता नहुँदा कतिपयले लागतभन्दा पनि सस्तोमा सिमेन्ट बेचिरहेको र कतिपयको सिमेन्ट बिक्री नै नुहने स्थिति आएको भन्दै हाल त्यसलाई सच्याउने प्रयास गरिएको बताएका छन् । उनीहरुले यसले बजारमा सिमेन्ट उद्योगहरुबीच स्वस्थ प्रतिष्पर्धा हुने विश्वास व्यक्त गरेका छन् ।
