काठमाडौँ । जमिन मुनिबाट सुन निकालिदिन्छु भन्दै ठगी गर्ने एकजना पक्राउ परेका छन् । नेपालगञ्जमा इट्टाभट्टा रहेको जमिनमुनिबाट सुन निकाल्ने भन्दै करोडौँ ठगी गर्ने ४२ वर्षीय सदाबुद्दिन हलवाई पक्राउ परेका हुन् ।

हलवाईलाई पीडितले दिएको उजुरीका आधारमा जिल्ला प्रहरी कार्यालय बाँकेबाट खटिएको प्रहरी टोलीले नेपालगञ्ज उपमहानगरपालिका-४ बसपार्कबाट पक्राउ गरेको हो ।

प्रहरीका अनुसार हलवाईले नेपालगञ्ज उपमहानगरपालिका-१९ स्थित मोहनपुर ईट्टाभट्टा भएको जमिनमुनि सुन भएको र उक्त सुन निकालिदिन्छु भन्दै २ करोड रुपैयाँ ठगी गरेको भेटिएको छ ।

हलवाईले सुन निकालिदिन्छु भन्दै पटकपटक गरी २ करोड रुपैयाँ पीडितबाट असुल गरेका थिए । तर, आफू ठगिएको थाहा पाएपछि पीडितले प्रहरीमा उजुरी दिएका थिए । सोही उजुरीका आधारमा हलवाईलाई पक्राउ गरिएको प्रहरीले जनाएको छ ।