काठमाडौँ । वैदेशिक रोजगारीका लागि विभिन्न देश पठाउने भन्दै रकम ठगी गर्ने दुई जनालाई प्रहरीले पक्राउ गरेको छ । पक्राउ पर्नेमा ५३ वर्षीय याद बहादुर बुर्जा मगर र ३५ वर्षीय संजय साह बानिया रहेका छन् ।
उनीहरुले आकर्षक तलबको प्रलोभनमा पारेर रकम ठगी गरेको प्रहरीले जनाएको छ । पक्राउ परेकामध्ये याद बहादुर बुर्जा मगरले दुई जनालाई क्रोएसिया पठाउने भन्दै ५ लाख ७५ हजार रुपैयाँ ठगी गरेका थिए भने संजय साह बानियाले एक जनालाई साइप्रस पठाउने भन्दै ४ लाख ६० हजार रुपैयाँ ठगी गरेका थिए ।
हाल उनीहरुलाई थप अनुसन्धान तथा आवश्यक कारवाहीका लागि वैदेशिक रोजगार विभाग पठाईएको प्रहरीले जनाएको छ ।
