काठमाडौँ । राष्ट्रिय स्वतन्त्र पार्टी (रास्वपा)का सांसद शिशिर खनालले नेपाली विश्वविद्यालयका टपरहरु (गोल्ड मेडलिस्ट)लाई सरकारी जागिरमा सिधै प्रवेश दिने कानूनी व्यवस्था गर्नुपर्ने बताएका छन् ।
बुधबार प्रतिनिधिसभाको राज्य व्यवस्था तथा सुशासन समिति बैठकमा भएको संघीय निजामती सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयकमाथिको छलफलका क्रममा सांसद खनालले नेपाली विश्वविद्यालयका टपरलाई सरकारी जागिरमा सिधा प्रवेश दिने व्यवस्था गर्नुपर्ने प्रस्ताव गरेका हुन् ।
नेपालबाट ठूलो युवा जनशक्ति विदेश गइरहेको बेला र नेपाली विश्वविद्यालय टप गर्नेहरु पनि अमेरिका, अस्ट्रेलियाका युनिभर्सिटीमा प्रोफेसर बन्न गइरहेको उल्लेख गर्दै उनले उनीहरुलाई सरकारी सेवामै प्रवेश गर्न प्रोत्साह गर्नुपर्नेमा जोड दिएका छन् ।
त्यस्तै, सांसद खनालले युवाहरुलाई सरकारी सेवामा आकर्षित गर्नका लागि पनि कानूनी व्यवस्था निजामती विधेयकमा राख्नुपर्ने प्रस्ताव गरेका छन् ।
