काठमाडौँ । निर्धन उत्थान लघुवित्त वित्तीय संस्थाले धनुषाधाम, धनुषामा व्यवसायिक भैंसी तथा गाई पालन तालिम दिएको छ । निर्धन संस्थाको आयोजनामा निर्धन उत्थान लघुवित्त वित्तीय संस्थाको संयोजकत्वमा निर्धन उत्थान लघुवित्त वित्तीय संस्था धनुषाधामका ३१ जना ग्राहक सदस्यहरुको सहभागितामा माघ ८ गते देखि १० गते सम्म ‘व्यावसायिक भैंसी तथा गाई पालन तालिम’ दिन लागेको हो ।
तालिमको उद्घाटन तथा दीप प्रजल्लन कार्यक्रममा प्रमुख अतिथी धनुषाधाम नगरपालिका ३ का वडा अध्यक्ष जय नारायण यादव, विशष्ट अतिथी निर्धन सस्थाका उपाध्यक्ष जनार्दन देव पन्त र निर्धन संस्थाका कार्यकारी अधिकृत अञ्जु पाण्डे रहेका थिए । कार्यक्रममा पन्तले ब्यववसायिक परियोजना तथा वित्तीय साक्षरता संबन्धि पुस्तक अध्यक्ष जय नारायण यादवलाई प्रदान गरेका थिए । कार्यक्रममा प्रमुख अतिथी यादवले आफ्नो मन्तव्य मार्फत संस्थाद्धारा संचालन गर्न लागेको सीप विकास तालिमले जन समुदायमा सचेतना वृद्धि गर्ने कुरा जनाए ।
जन समुदायले जिविकोपार्जनको लागि पशुपालन गर्ने गरेका छन्, उनीहरुलाई पशु बिरामी पर्दा के कस्तो किसिमको हेरचाह तथा स्वास्थ्य उपचार चाहिन्छ सोको बारेमा विशेष जानकारी नभएको र पशु विशेषज्ञ उपचार गर्न जाँदा समेत उपचार गर्न अग्रसर नभएको देखिन्छन् । त्यसैले हरेक गाँउ समुदायमा यस किसिमको तालिम प्रदान गर्न सकेमा पशुपालन व्यवसायमा ठूलो परिवर्तन हुने तथा स्थानियको आय बृद्धिहने छ भन्दै संस्थालाई धन्यवाद दिए ।
त्यसैगरी कार्यक्रमका विशष्ट अतिथी जनार्दन देव पन्त ज्यूले तालिममा उपस्थित सहभागीहरुलाई आजको आवश्यकता भनेको उद्यमीको क्षमता र संभावना अनुसार उचित सीप, स्रोत, साधन र बजारको पहुंच पुर्याउनु नै महत्वपूर्ण हुने र सोका लागि सीप विकास तालिम अति नै आवश्यक भएको बताए । पन्तले हाल ग्राहक सदस्यहरुले जिविकोपार्जनको हिसाबले १-२ वटा भैंसी तथा गाई पालन गरेर आफ्नो जिविको पार्जन गर्ने गरेकोमा सीप विकास सम्बन्धी व्यवसायिक शिक्षा लिई यसैलाई व्यवसाय बनाउन सकेमा वैदेशिक रोजगारीमा समेत जान नपर्ने बताए । उदाहरण स्वरुप १ वटा मुर्रा भैंसी पालन गरेर दैनिक सरदर १० लिटर दुध रु १०० का दरले बिक्री गर्दा वार्षिक रु १ लाख ७० हजार कमाउन सकिन्छ भने १० वटा पालन गर्ने हो रु १७ लाखसम्म आम्दानी गर्न सकिन्छ जुन कार्य हामी परिवारसंगै बसेर आफ्नै देशमा कमाउन सकिने बताए।
