काठमाडौँ । वैदेशिक रोजगारीका लागि विभिन्न देश पठाउने भन्दै रकम ठगी गर्ने तीन जना पक्राउ परेका छन् । पक्राउ पर्नेमा ३६ वर्षीय रमेश कुमार डि.स, ४१ वर्षीय जै बहादुर वली र ३८ वर्षीय रविन कार्की रहेका छन् ।
उनीहरूले आर्कषक तलबको प्रलोभनमा पारेर सिंगापुर, क्रोयसिया, स्लोभाकियालगायत देश पठाउने भन्दै रकम ठगी गरेका थिए । विदेश पठाउने भन्दै विभिन्न व्यक्तिबाट पैसा उठाएर विदेश नपठाई सम्पर्क विहिन भएका उनीहरुलाई काठमाडौँ उपत्यका अपराध अनुसन्धान कार्यलयबाट खटिएको प्रहरी टोलीले पक्राउ गरेको हो ।
प्रहरीका अनुसार रमेश कुमार डि.स. ले एक जनालाई सिङ्गापुर पठाउने भन्दै १० लाख रुपैयाँ, जै बहादुर वलीले एक जनालाई क्रोयसिया पठाउने भन्दै ६ लाख रुपैयाँ र रविन कार्कीले स्लोभाकिया पठाउने भन्दै ११ लाख ५० हजार रुपैयाँ ठगी गरेका थिए ।
हाल उनीहरूलाई थप अनुसन्धान तथा आवश्यक कारवाहीका लागि वैदेशिक रोजगार विभाग पठाईएको प्रहरीले जनाएको छ ।
