काठमाडौँ । वन तथा वातावरणमन्त्री ऐनबहादुर शाही ठकुरीले चालु आर्थिक वर्षभित्रमा मन्त्रालयबाट ४० हजार रोजगारी सिर्जना गर्ने लक्ष्य राखेर काम गरिरहेको बताएका छन् । बुधबार राष्ट्रिय सभाको बैठकमा बोल्दै मन्त्री ठकुरीले यस्तो बताएका हुन् । 

उनले वनसँग सम्बन्धित क्षेत्रमा सिर्जना हुने उक्त रोजगारीले युवा पलयान रोक्ने विश्वास व्यक्त गरेका छन् । 

मन्त्री ठकुरीले राष्ट्रपति चुरे विकास कार्यक्रम, जलवायु उत्थानशील चुरे कार्यक्रम र जलाधारमा आधारित जिविकोपार्जन आयोजना तथा गण्डकी जलाधार आयोजनामार्फत भिरालो जमिनमा फलफूल लगायतका खेतीहरु गरेर बाँझो जमिनमा उत्पादन प्रवर्द्धन गर्नेगरी काम गरिरहेको बताएका छन् । 

त्यस्तै, मानव वन्यजन्तुबीचको द्वन्द्व न्यूनिकरण गर्नको लागि जंगली जनावरहरुको लागि वनभित्रै बस्नेगरी काम गरिरहेको समेत मन्त्री ठकुरीले बताएका छन् । प्राकृतिक विपद न्यूनिकरण तथा वन व्यवस्थापनको क्षेत्र मन्त्रालयको प्राथमिकतामा रहेको उनको भनाई छ ।