काठमाडौँ । वैदेशिक रोजगारीका लागि विभिन्न देश पठाउने भन्दै रकम ठगी गर्ने दुई जना पक्राउ परेका छन् । पक्राउ पर्नेमा २१ वर्षीय सालिकराम बानियाँ र ३१ वर्षीया एलिना पुरी रहेका छन् ।

उनीहरुले बेरोजगार युवायुवतीहरुलाई आकर्षक तलबको प्रलोभनमा पारेर रोजगारीका लागि विभिन्न देशहरु पठाउने भनेर रकम ठगी गरेका थिए । प्रहरीका अनुसार सालिकराम बानियाँले एक जनाबाट ५ लाख रुपैयाँ र एलिना पुरीले एक जनालाई क्यानडा पठाउने भन्दै एक लाख ५० हजार रुपैयाँ ठगी गरेकी थिइन् ।

विदेश पठाउने भन्दै ठग्ने उनीहरुलाई काठमाडौँको विभिन्न स्थानहरुबाट पक्राउ गरी थप अनुसन्धान तथा कारवाहीको लागि वैदेशिक रोजगार विभाग पठाईएको छ ।